SEDP board ṭhiat turin sorkar phût

Mizoram Pradesh Youth Congress Committee (MPYCC) chuan, sorkar hnathawkte hnena pawisa dil ngai hial khawpa sorkar sum dinhmun a ṭhat loh avangin Mizoram sorkar chu SEDP board 14-te ṭhiat turin an phût.

MPYCC chuan, Covid-19 léng mek avangin Mizoram sorkar dinhmun nasa takin a tlahniam a, sorkar hnathawk páwlte intél khawmna Federation of Mizoram Government Employees & Workers (FMGEW) hnenah sorkarin thawhlàwm thawh turin a ngen hial tih an sawi a, "Kan ram sum leh pai dinhmun a chhe hle tih chiang taka a lan tâk avangin, ṭul loa sum khawh ralna SEDP board 14-te hi rang taka ṭhiat turin kan phût a ni," an ti.

Mizoram sorkarin minister awm thei zat a ruat kim hnuah SEDP board 14 a din tih sawiin MPYCC chuan, "SEDP board 14-te hi ṭangkaina sawi tur awm lo, a hminga nihna sang tak nei leh pawisa tam tak sên thlawnna mai a nih avangin, sorkar hian a mawhphurhna hria a, hripui vanga sum harsatna tàwpkhâwk kan tawh lai hian a ṭhiah nghal kan phût," an ti a; SEDP board 14-a thawkte hlawh atan kum khatah cheng nuai 2600 chuang sên ṭhin a nih bakah, inrêlbàwlna atan sum tam tak a ral thu an sawi.

Congress ṭhalaite chuan, Mizoram sorkar sum dinhmun a chhia tia sorkar hotupa ber a au reng laiin, hmun hrang hrangah SEDP leh state sum hmanga contract hnathawh hmuh tur a awm reng tih an sawi a, "Cheng vbc. 93-in airport cute ber siam hna thawh a ni a, PAHOSS hmangin khawpuia mi hausate hnenah cheng nuai za tam tak sem ral mek a ni," an ti.

MPYCC hian hripui léng vanga sum harsatna avangin kum khat tal chu contract hna pek titawp turin sorkar an ngen a; PAHOSS pek tur list tarlan tawhte pawh pawt lêt ngam turin an phût bawk.