Kum 18-44 inkarte Covid-19 vaccine pek dan tur la chiang lo

Kum 18-44 inkarte tana Covid-19 laka invènna damdawi (vaccine) Covishield pek dan tur leh man a neih leh neih loh turah Mizoram sorkarin thutlukna a la siam lo.

Vanglaini palai zawhna chhangin Health department hotute chuan, kum 18-44 inkarte pek tur chu Mizoram sorkarin vaccine siamtute hnenah a chah tawh a, a thlen hun tur erawh hriat a nih loh thu an sawi a, "A leina tur pawisa ngai zat pawh kan chhût tawh a, mahse, a lo thlen hun tur leh a lo thlen huna kum 18-44 inkarte pek dan tur kan la hre lo. India ram pumah vaccine indaih lohna a nasa a, a lo thlen mai a beiseiawm loh," an ti.

Frontline worker, healthcare worker leh kum 45 chung lam zingah vaccine dose la la kim lo an la awm nual thu sawiin Health department hotute chuan, "Anni chu sorkar laipui thu angin a thlàwn veka pek an ni a, tuna la dawng lote pawh a thlâwna la pek zel a ni dawn," an ti a; kum 18-44 inkar vaccine late'n a man an pek dawn leh dawn lohah Mizoram sorkarin thutlukna a la siam lo tih an sawi.

April 30, 2021-a Health minister Dr R Lalthangliana hoa sorkar hotute ṭhukhawm chuan, Mizoram sorkarin kum 18-44 inkarte tan Serum Institute of India hnenah vaccine a dil thu te, Mizoramah kum 18-44 inkar Covid vaccine pek ngai tur mi nuai 4,40,000 vel an awm thu te, dose khat Rs. 300 man niin, a vaiin cheng nuai 306.6 vel sèn a ngai tura chhût a nih thute tarlan a ni.

Meeting-ah hian Health Minister chuan, Chief Minister remtihnain Serum Institute of India hnenah vaccine dose 10,22,000 an dil thu sawiin, "Kar li chhungin min pek theih dawn leh dawn loh an rawn sawi dawn," a ti a; kum 18-44 inkarte tan vaccine pek turah Ministry of HFW leh vaccine siamtute chu Mizoram tan dose 16,340 dah tura an inbiakrem tawh thu a sawi bawk.