KHAWTHLIR

Thisen pe
State NSS Cell chuan nimin khan Civil Hospital, Aizawl Blood Bank-ah thisen pek an huaihawt a, NSS volunteer mipa 15 leh hmeichhia pangate'n thisen unit 20 an pe. Thisen petute chu Mizoram University aṭangin mi 17 leh Mizo HSS aṭangin mi pathum an ni.

SRH-ah mi 11-in Ventilator hmang
State Referral Hospital ICU-ah nimin tlai dar 5 dinhmun angin Covid-19 vei mi 13 enkawl an ni a, an zinga 11 chu ventilator hmantir an ni. SRH-ZMC Bulletin tarlan danin, SRH-ah hian nimin khan hripui vei mi pakua dah luh an ni a, anni nen mi 107 an awm mek. Ward-ah mi 94 an awm a, an zinga mi 15 chu oxygen pek mek an ni.

Containment area
Covid-19 hri léng avangin Zokhawthar chu tlawhpawh phal loh hmun, containment area-ah May 5, Nilaini khan Champhai additional DC Henry C Lalrawnkima chuan a puang a; nimin khan Nghalchawm khua chu containment zone-ah Mamit DC Dr Lalrozama chuan a puang bawk. Containment zone/area chhungah hian phalna bik nei lote chu luh leh chhuah khap a ni.

CM Relief Fund pe
Salvation Army, India Eastern Territory chuan nimin khan Covid-19 donaa a ṭul apianga hman turin Chief Minister's Relief Fund-ah Rs. 10,00,000 an pe a, territorial commander Com. Lalzamlova'n a hlân.

Kanhmun tlawh
Mamit DC Dr Lalrozama chuan nimin khan state dang aṭanga Mizoram lutte endikna hmun - Kanhmun screening point leh Assam leh Tripura aṭanga Mizoram luhna hmunte a tlawh a; duty-te nen an hmalaknate an sawiho. Bawrhsap hian Kanhmun screening point-a isolation room leh medical duty-te hman atan Rs. 90,000 leh medical duty, ramri gate duty police leh Kanhmun VTF-te hnenah pawisa a pe a ni.