Covid-19 vei enkawl mek CCC aṭanga zuanthlak vangin a thi

Tlabunga Covid-19 vei enkawl mek, PC Laldingliana (38) s/o PC Lalthanzuala, Tlabung chu May 5, Nilaini zan khan enkawlna hmun Covid care centre (CCC) aṭanga a zuanthlak avangin a thi a; Covid-19 vei thi anga chhiar a nih dawn leh dawn loh erawh a la chiang lo.

Tlabung aṭanga thu dawn danin, PC Laldingliana hi May 2, 2021 khan Covid-19 positive a ni tih hmuh chhuah a ni a; symptom a nei lo a, Tlabung Tourist Lodge CCC-ah dah luh niin, chhâwng chung ber (chhawng lina)-a pindan pakhatah mi dang pahnih nen awmtir a ni.

Tourist Lodge CCC-a awmte sawi danin, PC Laldingliana hian May 4 zan aṭangin buaina a nei a, a awmpuite pawhin an buaipui deuh niin an sawi.

Nilaini khan tlai dar 4:30 velah tukverh aṭanga zuanthlak a tum a, a awmpuite'n an dang hman a; tlai dar 6:30 velah a zuangthla ta tho a ni. Damdawi-inah lak nghal ni mah se, a hliam tuar loin zan dar 7:30 velah a thi a ni.