Delhi Mizoram House-ah Covid-19 vei 6 enkawl mek
Delhi Vasant Vihar-a Mizoram House hall chu Delhi-a Covid-19 vei Mizote enkawl nan buatsaih tawh a ni a, mi paruk an awm mek.
Mizo Welfare Association, Delhi (MWAD) hruaitute hnen aṭanga thu dawn danin, Delhi Mizoram House hall hi Covid-19 vei mi paruk awm theihna tura ruahman a ni a, mi paruk awm mekin, Mizoram House-a thawk zinga hripui veite an ni hlawm.
MWAD chuan Mizoram House-a awm theih dan tur leh oxygen hman dan tur an ruahman a; Mizoram House hall chu Mizoram aṭanga Delhi leh a chhehvela awm Mizo (Mizoram permanent resident)-te zinga hripui vei damlote tan inenkawl lailâwkna hmun a nih thu leh hripui vei, oxygen mamawh tan pan theih a nih thu an tarlang.
MWAD chuan, Mizoram House chu Covid-19 positive damlote'n damdawi-ina an luh theih hmaa inenkawl lailâwkna a nih thu tarlangin, "An awm chhunga senso hi Mizoram sorkar tum tur a ni a, ei leh in leh oxygen bûr thun khah lehna man chu damlote tum tur a ni," an ti.
MWAD tarlan danin, hmanhmawhthlak bik thilah damlote'n Mizoram House pan kher loa ina oxygen an mamawh chuan, Mizoram House hotute phalna la hmasain oxygen bûr hawh theih a ni a, oxygen bûr an kawl chhunga oxygen an mamawh belh chuan, thun khah (refill) leh chu mahnia inbuaipui tur a ni. Oxygen bûr hawh man a awm lo a, pek kìr hunah a thun khah lehna man chu damloin chawi a ngai thung.