Covid dona atan sorkar hnathawkin Ni khat hlawh an thawh dawn Sorkar inrenchem ve se an duh

Federation of Mizoram Government Employee & Workers (FMGEW) bultuma sorkar hnathawk pawl hrang hrangte nimina Vanapa Hall-a ṭhukhawm chuan, Covid-19 dona atan an ni khat hlawh sorkara thawh an remti. Hetih lai hian, sorkar chu inrenchem ve se an duh thu mi tam takin an sawi chhuak.

Chief Secretary chuan FMGEW hruaitute kâwmin, Covid-19 dona atan thawhlawm thawh ve turin a ngen a; chumi bawhzui chuan FMGEW chuan pawl hrang hrang aiawh pakhat ṭheuh kokhawmin, pawl 65 aiawh an tel. Finance secretary Vanlalchhuanga leh IDSP state nodal officer Dr Pachuau Lalmalsawma-te pawh an tel a, an department dinhmun an sawifiah.

Inhmuhkhawmna hi FMGEW president Vanlaltlana'n a kaihruai a; secretary general J Ramdinmawia chuan, nikum lam aṭangin sorkar hnathawkte'n Covid-19 do nan theihtawp an chhuah tih sawiin, "Thâ leh zung bakah sum tam tak kan sêng tawh. A langsar lo lamah pawh Covid-19 hma aia buai zawk leh hah zawk an awm. Chutihrualin, âwl deuh zawk pawh eng emaw zat an awm ve tho," a ti.

Dr Pachuau Lalmalsawma sawi danin, Mizoram sorkarin Covid-19 dona atan first wave-a sum a sên dan chu - Health & Medical Education-in cheng nuai 800, Health Services-in cheng nuai 2626, National Health Mission-in nuai 1584, Zoram Medical College-in cheng nuai 500 leh AYUSH-in cheng nuai 100 vel a ni.

Covid-19 second wave léngah chawh rualin ni tin cheng nuai 27.52 vel sèn a ni a, Covid-19 vei neih dan leh dinhmun azirin a danglam thei.

Sawihonaah páwl hrang hrang 39 aiawhin an pawl ngaihdan an sawi a, pawl pathum tih loh chuan sorkara thawhlawm thawh ṭha an ti. Pawl pathumte chu frontline worker lam vek an ni a, ngaihnathiam deuh an dil a, chutih rualin, meeting-in a remti lo a nih chuan tlânchhiat an tum loh thu an sawi. An pawla group C leh D-te chu ngaihnathiam tura an duh thu an sawi bawk.

A tam ber duh dan angin, Covid-19 do nan ni khat hlawh thawh turin thutlukna an siam a; chutih rualin, tihluihna a nih loh avangin pawl leh mimal harsatna bik neite chu inthlahrung lo turin an ti.

Hetih lai hian sorkar hnathawk kal khawmte zingah Mizoram sum dinhmunin a zir lo a nih chuan sorkar chu inrenchem lamah ṭan la ve se an duh thu sawi chhuak an awm nual. An ngaihmawh zualte chu - SEDP board 14 te, PAHOSS-a sum tam tak pek chhuah te, sum harsa tih reng laia contract hna inpêk rengte a ni. Ṭhenkhat chuan inrenchem kalpui a nih dan rualkhai loa an hriat thu an sawi bawk.