RT-PCR pek tawh hman duh loh hi mipui zah lohna a ni - Zodintluanga

Congress Legislature Party (CLP) leader Zodin­tluanga Ralte chuan, Civil Hospital, Lunglei tana nikuma RT-PCR khawl a pek tawh sorkarin a hmang duh lo chu mipui zah lohna a nih thu a sawi a; Mizoram sorkar chu mahni sum hmang phal loa mi dang sum hmang chauha hripui do tumah a puh.

CLP Leader hian nimin khan thuchhuah siamin, nikumah RT-PCR khawl a pêk thu a tarlang a, "Hripui thawh hnihna avangin RT-PCR kháwl lei tur a váng tawh hle tih mithiamte’n an sawi. Heti chung hian RT-PCR ka donate chu hman tangkai lohin a la awm reng a, hei hi mipui zah lohna leh eptu party-te’n hripui donaa sorkar kan ṭanpui vena hnâwlna leh pawm duh lohna, sorkarin ṭang ruala do a duh lohzia lanna chiang tak niin ka hria," a ti.

Zodintluanga Ralte chuan, "Ka ngaihdan chuan, hripui hi ṭang ruala do tur a ni a, sorkar ringawt chêttir loin, eptu party-te pawh kan theihna zâwnah kan thawk ve tur a ni tih hi a tìr aṭanga ka ngaihdan a la ni reng," a ti a; Covid-19 donaah a páwng a puia sorkar sawisel a duh lo a, chhan ṭha tak a awm loh chuan a sawisel ngai lo tih a sawi.

CLP Leader chuan, Covid-19 léng thawh hnihnain Mizoram a rùn mek avangin sorkarin hripui dona turin sum mamawh tâwk nei loa insawiin, Mizoram sorkar hnathawkte chu an hlawh aṭanga sum thawh turin a ngen tih a sawi a, "Hetih lai hian, sorkarin hripui dona tur pawisa a nei lo tak tak em tih hi chhût tham a awmin ka hria," a ti.

CLP leader Zodin­tluanga sawi danin, CM Relief Fund-ah May 5, 2021 dinhmun angin Rs. 1,33,34,984 a awm a, Covid-19 dan bawhchhia mi 88,856-te sum chàwi Rs. 1,77,90,800 a awm. SEDP-ah kum 2021-22 budget-ah cheng nuai 40,000 leh state sum liau liau tur Finance department-ah nuai 58,000 dah a ni bawk.

SEDP sum chu Chief Minister leh Finance Minister ni bawkin state-in a mamawh ang zelin a hmanna a siam rem thei tih sawiin Zodintluanga chuan, "Hripui dona atan SEDP sum hi hman theih a nih lohna tur a awm lo a, an duhsak záwngte hna thawhna atan chauha hmang loin, hripui dona atan hmang turin ka ngen a ni," a ti.

Finance-a state sum 58,000 dah pawh Finance Minister (CM)-in a duh chuan a siam rem thei tih sawiin CLP Leader chuan, "Hripui dona atan hman tur a tih chuan hman mai tur a ni. A duh chuan kum dang angin a duhsak zawng minister vulh nan a hmang thei bawk," a ti a; Finance department-a sum dah chu CM thuneihna hnuaia mi a nih thu a sawi.

Zodintluanga Ralte chuan, Covid-19 chu páwl leh mimal ṭhahnemngaite thawh khawm ringawt hmanga do tur nia a ngaih loh thu sawiin, "Sorkar hian SEDP-a mi te, PAHOSS sum te, Finance department hnuaia sum dahte a pawt khawm ang a, state sorkar sumin a daih ngang lo a nih chuan state dangte tih angin Central-ah pawh a dil belh thei a, mipui pawhin kan thawh duh ngei a rinawm," a ti a; Mizoram sorkar chu mahni sum hmang phal loa mi dang sum hmang chauha hripui do tumah a puh a ni.