Kolasib-ah TrueNAT kháwl thar dah

Minister of state K Lalrinliana chuan May 5, Nilaini khan a bial chhunga Kolasib District Hospital-ah swab sample endikna kháwl Truenat UNO a dah. Kháwl thar hmang hian ni khatah sample 10 endik theih tura beisei a ni.

Kolasib District Hospital-a TrueNAT kháwl hman lai chu April 13, 2021 aṭangin a chhia a, siamtirna hmunah thawn a ni. Siamṭhat a nih hnuah inthawn lêtna kawngah harsatna a awm avangin Kolasib district-ah TrueNAT hmanga sample endik chu chawlh lailawk a ni a, RT-PCR hmanga endik turte chu ZMC-ah thawn a ni ṭhin.

K Lalrinliana chuan, "Health Minis­ter hnenah harsatnate ka sawipui a, TrueNAT khawl awm sa siamṭhat a nih hmaa hman turin Truenat UNO chu Health department aṭangin kan la ta a ni," a ti a; District Hospital hnenah hian hand sanitiser, PPE suit, kutkawr leh hmai tuamnate a pe bawk.

Kolasib District Hospital aṭanga thu dawn danin, TrueNAT khawl ṭha lo chu nimin khan Kolasib thlenpui a ni a, hei vang hian minister K Lalrinliana'n TrueNAT UNO a dah chu an laknaah an pe kir leh nghal dawn a ni.