SRH-a oxygen man lak chungchanga Thupek chhuahtu insawifiah tura tih a ni

Health minister Dr R Lalthangliana hoin nimin khan SAD conference hall-ah sorkar hotute an ṭhukhawm a; SRH-ZMC-a oxygen hman man lâk chungchanga hriattirna chhuahtu, SRH medical superintendent Dr HC Laldina chu insawifiah tura hriattirna (show cause notice) pek a nih thu tarlan a ni.

Ṭhutkhawmah hian, State Referral Hospital-a damlo awm, oxygen hmangte aṭanga a man lâk tura thupek awm chu sorkar hriatpui loha chhuah a nih avangin ṭhiah nghal a nih thu sawi a ni a, "He thupek chhuah chungchanga mawhphurtu chu sorkar hotute hriatpui loha thupek a chhuah chhan sawifiah tura hriattirna ‘show cause notice’ pek a ni," an ti.

Health minister Dr R Lalthangliana chuan, Covid-19 veite ṭha taka enkawl turin sorkarin theihtawp a chhuah tih sawiin, "Kan dinhmun a khirh mek laia kohhran, páwl leh mimalte'n CM Relief Fund-a kan mihringpui, hripui vanga harsatna tawkte ṭanpuina tur leh hripui léng laka kan him theihna tura sorkar hmalakna tihchak nana sum an thawh ṭhin hi a ropui tak zet," a ti a; hripui do turin Mizo mipui an ṭan rual thu a sawi.

Medical Operational Team (MOT) chairman Dr ZR Thiamsanga chuan, Mizorama Covid-19 hripui léng do turin MOT-in Mizoram dinhmun an zir chian hnuah rawtna hrang hrang sorkarah an thlen ṭhin thu a sawi a, "Heng zingah hian sorkar hnathawkte thawhlawm thawh tura sàwm rawtna pawh a tel a, kan rawtnate sorkarin ngai pawimawha hma a lak avangin kan lawm hle," a ti.

Meeting-ah hian tarlan danin, Mizorama Covid-19 veite enkawlna Covid care centre (CCC) leh community covid care centre (CCCC) dinhmun thlirho a ni a; Aizawl district-ah mi 873 awm theihna CCC 11 a awm a, May 5, Nilaini tlai dar 3 dinhmun angin mi 613 an awm. Mizoram pumah mi 2,045 awm theihna CCC 36 a awm a, May 5, 2021 tlai dar 3 dinhmun angin Covid-19 positive mi 1,069 an awm mek a ni.

Aizawlah man chawia awm theihna (paid CCC) pahnih a awm a; State Guest House-ah mi 12 awm theiin, Tourist Lodge, Chaltlangah mi 29 an awm thei a, mi 31 an awm mek. New Capital Complex-a MRB office sak thar chu paid CCC atan ruahman tum a ni.

Aizawlah khawtlang leh kohhran enkawl CCCC 10 a awm mek. Khum 150 dah theihna Agape Camping Centre, Durtlang chu Dawrpui Presbyterian Kohhran Pastor bialin CCCC atan hman phalna an pe tawh a, khum 80 dah theihna Synod Revival Camping Centre, Neihbawih pawh CCCC atana hmang turin Mizoram Synod hotute'n phalna an pe tawh. Synod Revival Camping Centre atan hian Aizawl Theological College chuan mattress an thawh tur thu an sawi. Khum 63 dah theihna tur Central YMA enkawl Girls Hostel, Lawipu pawh CCCC atana hman turin buatsaih mek a ni bawk.

Ṭhutkhawmah hian Aizawl mayor Lalrinenga Sailo, Mizoram Kohhran Hruaitute Committee, Joint NGO Coordination Committee, Aizawl City Area Local Council aiawhte leh Health & Family Welfare, Tourism, PWD, PHE, PWD leh Finance department hotute an tel a ni.