Sum harsa sa hri lengin a belhchhah; Vaibelchhe 1,000 vel kan mamawh - Finance Secretary

Finance secretary Vanlalchhuanga chuan, Mizoram sum dinhmun a ṭhat loh thu sawiin, sum dinhmun harsa tawh sa chu Covid-19 hri lengin a belhchhah a ti a, "Kan sum mamawh hi cheng vbc. 1,000 tél a ni," a ti.

FMGEW-in nimina pawl hrang hrang aiawhte Vanapa Hall-a a kohkhawmnaah Finance Secretary chuan, "Kan sum dinhmun hi tuna rawn harsa thut a ni lo a, hri lêng hian a belhchhah a ni. 13th Finance Commission hma khan sumah kan harsa em em a, a hnuah pawh a harsa deuh tho," a ti a; 14th FC laiin sorkar laipui aṭanga sum hmuhna hnár lian tax revenue leh post revenue deficit grant-ah sum an hmuh ṭhat thu a sawi.

Vanlalchhuanga chuan, 14th FC lai chuan revenue deficit grant-ah thla tin cheng vbc. 226 an hmu ziah ṭhin tih sawiin, "15th FC hnu, nikumah chuan cheng vbc. 118 chiah thla tin kan hmu a, keini ang state tê tan chuan vbc. 100 chuanga hmuh tlem hi a buaithlak tham hle. Hei bakah hian nikum khan central tax revenue aṭangin cheng vbc. 1,185 hmuh kan inbeisei a, Covid-19 vanga chhiah tlingkhawm a tlem avangin kan hmu phâk lo hle," a ti.

Finance Secretary chuan, Covid-19 a reh deuh hnuah sum dinhmunin ziaawm lam a pan thu sawiin, "April 2021-ah pawh group A, B, C leh D hlawh a rualin kan pe thei. Covid-19 avangin bill bá kan ngah a, chu chuan min la nghawng. Budget kan buatsaih lai hian Covid-19 a ziaawm a, tunah ruahman lâwk lohnaah sum sènna tur a tam leh si a ni," a ti a; Covid-19 avangin sum dinhmun tur sawi lâwk theih a nih loh thu a sawi.

Tun hnaia sum harsat zual chhan sawiin Vanlalchhuanga chuan, "April-ah khan tun hma deuha loan kan lâk rulh ngei ngai a awm avangin cheng vbc. 150 kan pe chhuak. Hei bakah hian project tàwp mai tur a awm a, chu chu kan ui si avangin cheng vbc. 70 kan pe chhuak bawk a, hei hi chu kan la hmuh leh tho tur a ni. Kan overdraft ang tihte a hlauhawm ṭhin a, nikum khan kan overdraft ṭêp a, kan la invéng ve zel thei rih a ni," a ti.