ASF lên chhan la chhui chhuak lo ASF vangin vawk 5,120 a thi tawh

AH & Vety department chuan Mizorama African Swine Fever (ASF) lèn chhana ngaih, state/ram páwn aṭanga vawk la luttu chhui chhuah a la nih loh thu an sawi. ASF avang hian Mizoramah nimin thleng khan vawk 5,120 a thi tawh.

Vanglaini palai zawhna chhángin AH&Vety hotute chuan, ASF lèn chhana a mawhphurtu chhui chhuak turin ASF lènna district - Aizawl, Mamit, Serchhip, Lunglei leh Lawngtlai DC-te ngen an nih thu an sawi a, "Keini chu a chhui hna thawktu kan nih chiah loh avangin DC-te kan ngen a, an hnen aṭangin report kan la dawng lo," an ti.

AH&Vety department hotute sawi danin, Chief Secretary pawhin ASF lèn chhana a mawhphurtu chhui chhuah a ngai pawimawh a, police lamah pawh DIG kaihhruaina hnuaiah investigation team a dintir a ni.

Tarlan tawh angin, Mizorama ASF a lên chhan chu a rûka state/ram páwn aṭanga vawk leh vawk aṭanga thil siam la lut an awm vanga ngaih a ni.

ASF avang hian Mizoramah vawk thi a awm belh zel a, nimin bikah vawk 23 thiin, thi tawh zawng zawng chu 5,120 a ni. Vawk thi a awm belh zel avangin AH&Vety chuan sum hloh zat tur an la chhût lo.

Hetih lai hian, chhan hriat loa vawk thi pawh a awm belh zel a, nimin thleng khan Mizoram hmun hrang hrangah chhan hriat loa vawk thi hi 866 a awm tawh a ni.