Siahaah Covid hnu chhui hna thawh a ni

Siaha khawpuia Covid-19 darh mek vên nan Siaha chief medical officer (CMO) Dr C Hnichho leh Cluster Operation nodal officer Dr K Rakhu te kaihhruaiin Siaha medical team-te'n May 3, 2021-a random test hmanga hripui vei hmuh chhuah mi 30-te nena inkungkaihna nei (primary contact leh secondary contact) zawn chhuah hna an thawk mek.

Siaha khawpuia random test hmanga Covid-19 positive hmuh chhuah tamna veng pahnih - College Vaih leh New Colony-ah medical team-te chu an inkulh a; hripui vei tawhte nena inkungkaihna nei, first contact-te chu RAT hmangin an swab sample endik a ni.

Medical team hian veng pahniha Covid-19 positive hmuh chhuah hnuhnun berin Covid care centre a chhuahsan thlengin an awmchilh dawn a, chumi zawhah veng dangah an insawn zel dawn a ni. Medical team hi MTP branch-te'n an pui bawk.