CCC-a awmte tan damdawi pe

Aizawl West-III bialtu MLA VL Zaithanzama chuan May 5, Nilaini tlai khan a bial chhung, Mission Vengthlanga SAI Hostel Covid Care Centre (CCC) a tlawh a, hripui vei enkawl mekte tan damdawi eng emaw zat a pe. Bialtu councillor Ramthanzauvi pawhin damdawi eng emaw zat a pe ve nghal bawk.

VL Zaithanzama chuan, CCC-a awm mekte chu dam taka an chhuah ngei theih nan duhsakna a hlân a; harsatna an neihte a hnen a thlen hreh lo tur leh mangang lo tura chahin, a ṭul ang zelin theihtawp a chhuah tur thu a sawi.

MLA-in a tlawh lai hian SAI Hostel CCC-ah hripui vei mi 93 an awm a; damdawi an tlâkchham thu bialtu MLA leh councillor hnenah an thlen avangin, damdawi an mamawh angte chu an pe a ni.