Mizoram sum harsat dan dik tak Sawifiah turin ZLP-in CM an phût

ZPM Legislature Party (ZLP) chuan, chief minister leh finance minister Zoramthanga chu Mizoram sorkar sum dinhmun dik tak sawifiah turin an phût a; Serchhip bial by-election-a thlan tlin Lalduhoma chu kár leh chhung ngeia la lut turin Assembly speaker Lalrinliana Sailo an ngen.

Nimin khan ZLP chuan thuchhuah siamin, MLA atana Lalduhoma lâk luhna tur Assembly Speaker-in tiam chin awm loa a ṭhulh chu pawi an tih thu an tarlang a, "Kar lehah hian, fimkhur tak chungin, MLA atana la lut ngei tawh turin kan ngen a ni," an ti.

ZLP chuan, Mizoram hotupa ber CM Zoramthanga'n sorkar sum dinhmun mipui hnenah a sawi chiang ngai lo tih sawiin, "A duhna lama sum séng thei reng chunga sorkar hnathawkte hnena vehbûr a khawn ta mai hi ram hruaitu awm dan tur ni loa kan hriat avangin ngáwi theiah kan indah ta lo a ni," an ti a; ṭan rualna a ṭhat zawk nan leh CM Relief Fund-a sum pe duhte'n rilru dam taka an pek theih nan mipui hnena thuchah siama sorkar harsatnate sawifiah turin Chief Minister an phût a ni.

Kum 2021-22 budget-ah SEDP atan cheng nuai 40,000 dah chu Covid-19 vanga ei leh in lama harsatna tâwkte leh rál hmatáwnga ṭang VTF/LTF-te ṭanpuina atana hmang turin ZLP chuan an phût a; Mizoram State Health Care Scheme sum báwma cheng nuai 20,000 chuang la awm chu Covid-19 veite'n a thlàwna inenkawlna an dawn theih nan a hmang turin an ngen bawk.

ZLP chuan, "Mahni duhsak zawngte tana hna siamsak hi titawpin, mipui tana luang chhuak zawk tawh turin kan CM hi kan beiseiin kan phût tlat a ni," an ti a; sum hman danah, tuna mamawh ngawih ngawih leh la dahṭhat rih theih turte thliar a hun hlea an ngaih thu an tarlang.

Tuna Covid-19 donaa Mizoram sorkarin hma a laknate chu an thláwp a, puih an ngaihnaah an inpeih reng tih sawiin ZLP chuan, "Covid-19 avang hian harsatna tam tak la hmachhawn thei kan ni tih hre chungin MLA fund aṭanga sum hlawma (cash) LTF/VTF-te leh mipui harsatna tâwkte ṭanpui theih dan tur min ngaihtuahpui turin sorkar kan ngen a ni" an ti.

ZLP thuchhuah chuan, kum 2021-22 budget chu hman a nih hmain hripui dona atana pawh pèn a ngaih leh tâk avangin, a nihna tur taka hman a nih theih nan Assembly session ko a, budget re-appropriation (siamṭhatna) neih ni se an duh thu a tarlang bawk.