RIPANS zirlaite'n sorkar an pui

Mizoram sorkar ngenna angin RIPANS-a zirlai 70 vel chuan hlawh/ lawmman nei loin Co­vid-19 donaah Mizoram sor­kar puiin an thawk mek.

RIPANS hotute chuan Vanglaini palai zawhna chhangin, Covid-19 donaa thawk turin ngenna an dawn thu an sawi a, "Sorkar lamin min rawn ngen a, intihluihna a awm lo. Sorkar zirna-in kan nih angin kan mawhphurhna a ni ve tho a, an rawn ti har angreng zawk a ni," an ti.

RIPANS hotute sawi danin, RIPANS zirlai, Covid-19 donaa hlawh nei loa thawkte chu mi 70 vel an ni a, Pharmacy leh Medical Laboratory Technician (MLT) zirlai, course zo tawh, internship ti mekte an ni hlawm. Chu'ng mite chu Mizoram sorkarin swab sample latu atan leh Covid vaccine petu atan a hmang a ni.