Taiwan aṭangin oxygen hmanrua dawng
Taiwan sorkar leh Meihu University, Taiwan chuan nimin khan Mizoram sorkar hnenah oxygen concentrator leh cylinder 15 ve ve a pe.
Sorkar thuchhuah tarlan danin, Taiwan aṭanga oxygen concentrator rawn thleng hi India-Formosa Foundation chairman Jonathan Lalremruata chuan Health minister Dr R Lalthangliana hnenah a hlân a ni.
Health Minister chuan, "Taiwan sorkar hnen aṭanga vawiina kan thil dawn hian chief minister Pu Zoramthanga’n Zoram mipui himna turah ngaihtuahna a sên zauzia a tarlang," a ti a; Taiwan sorkar hnena lehkha a ziah bawhzuitu Lok Sabha MP C Lalrosanga ṭhahnemngaihna fakawm a tih thu a sawi.
Dr R Lalthangliana chuan, Chief Minister-in ventilator ṭha chi 35 lei a remtih thu sawiin, "Nikum khan PM Cares hnuaiah ventilator 100 chuang zet kan dawng a, private hospital-te pawh kan sem hial. Amaherawhchu, Covid-19 hrik hian chuap a khawih chhiat nasat ṭhin avangin oxygen 100%-a an kaltir pawhin Covid-19 vei damlote oxygen mamawh a pump zo lo ṭhin a ni," a ti.
Ireland sorkarin India hnenah oxygen concentrator 500 a pek thu leh chumi aṭanga 60 chu Mizoram tan sorkar laipuiin a rawn pe a, Mizoramah a rawn thlen tawh thu Health Minister chuan a sawi bawk.
Lok Sabha MP C Lalrosanga chuan, Chief Minister hmalakna bawhzuiin India rama Taiwan Ambassador kaltlangin Taiwan sorkar a dâwr thu leh Covid-19 dona hmanrua dang pawh dawn belh beisei a nih thu a sawi.