Forest reserved-a court thutlukna Khin lêt kan tum - Forest Minister

Gauhati High Court, Aizawl Bench-in Mizo­rama lui 16 kam forest reserve ni ṭhin ṭhiahna thupek chu an khin lêt ngei dawn thu Environment, Forest & Climate Change (EFCC) minister TJ Lalnuntluanga chuan a sawi.

Nimina Vanglaini palai zawhna chhangin TJ Lalnuntluanga chuan, Gauhati High Court thupek khing lêt turin hma an lâk mek thu a sawi a, "Páwng khin lêt mai theih a ni lo a, uluk taka case zir chianga inbuatsaih a ṭul. Covid-19 avangin inbuatsaihna a kal chak thei lo. Kan depart­ment chuan lui kam forest reserved nihtir loh hi ṭha kan ti lo a, chuvangin, khin lêt ngei kan tum a ni," a ti.

HighCourt thutlukna chungchangah hian Central YMA chuan, Mizoram sorkarin hmalak a tum lo nia an hriat avangin, thupek sût a nih theih nan Gauhati High Court thupek chu khin lêt an tum a, hma an la mek a ni.

Mizoram Chief Secre­tary-in August 5, 2016-a order a chhuah leh January 28, 1965-a notification a tihchhuah, The Mizo District (Forest) Act, 1955-a Section ṭhenkhat chu mi 681-in Gauhati High Court, Aizawl Bench-ah an khing a ni.

The Mizo District (Forest) Act, 1955 chung­changa sorkar order leh notification chu High Court-in a tibo a, chuvang chuan Tuirial Hydro Electric Power siamnaah mi 681 hnenah zangnadawmna cheng nuai 3,000 chuang Mizoram sorkarin a sèn belh a ngai dawn.

Tarlan tawh ṭhin angin, Assembly session hnuhnung berah khan INC member C Ngun­lianchunga zawh­na ziaka P&E minister R Lalzirliana'n a chhàn­naah chuan, Tuirial HEP-a zangnadawmna chungchangah sorkarin court sang zawkah kal tumna a neih loh thu a tarlang a, "Court order angin petitioner-te hnenah hian zang­nadawmna pek dan tur ngaihtuah mek a ni," tia chhàn a ni.