Kum 18-44 inkarte a thlàwnin Covid vaccine pek a ni dawn

Health & Family Welfare minister Dr R Lalthangliana chuan, Mizorama kum 18-44 inkarte chu Covid-19 laka invènna damdawi (vaccine) a thlàwna pek an nih dawn thu nimin khan a sawi.

Health Minister chuan, chief minister Zoramthanga'n Zoram mipui himna a ngaih pawimawh avangin kum 18-44 inkarte hnenah a thlàwnin Covid vaccine pek a phalsak thu a sawi a, "Kan chhût dan chuan kum 18-44 inkar vaccine pek ngai mi nuai 5 vel kan nei a, dose hnih ṭheuh lak a ngaih avangin vaccine hi dose nuai 10 vel lei kan ngai dawn a, hemi atan hian cheng vbc. 30 chuang sên a ngai dawn a ni," a ti.

Covid-19 vaccine lei turin a siam chhuakte hnen aṭangin order siam a nih tawh thu sawiin Dr R Lalthangliana chuan, "India ram pumah demand a san avangin a siamtute'n an supply hneh lo deuh a, vaccine kan dawn theih hun tur a la hriat theih rih loh," a ti a; vaccine chu nghah deuh a la ngaih tur thu a sawi a ni.