Covid-19 vei Mizo pahnih thi

Lalmuanpuii (47), Ramhlun Venglai, Covid-19 vei vanga SRH-ZMC-a enkawl lai chu nimin zing dar 8.04 khan a thi a; H Lalnunhlima (44), Bawngkawn, Aizawl pawh nimin chhun dar 11:15 khan Covid-19 avangin Delhi-ah a thi bawk.

Thu dawn danin, Lalmuanpuii hi thin (liver) cancer a ni a, hun eng emaw chen phai lama an inenkawl hnuah May 3, 2021 khan Mizoramah an rawn haw a, Lengpui Airport-ah RAT hmanga a swab sample endiknaah Covid-19 vei a ni tih hmuh chhuah a nih avangin SRH-ZMC-ah dah nghal a ni. Amah hi a fanu nen chauha khawsa an ni a, nimin chhun dar 1 khan Ramhlun Venglai thlanmualah vui a ni.

Mizo Welfare Asso­ciation, Delhi (MWAD) hruaitute hnen aṭanga thu dawn danin, Delhi-a Covid-19 vei thi H Lalnun­hlima h/o Lal­chhan­dami Kawlni chu missionary an nih avangin an chhungkuaa Delhi-a awm an ni a; hun eng emaw chen Sardar Vallabhai Patel Covid Center-a enkawl a nih hnuah a thi a ni.

H Lalnunhlima ruang hi Mizoramah hawn a nih theih nan MWAD-te'n an buaipui a; nimin khan Deen Dayal Upadhyay Hospital-ah a ruang dah luh a ni. Vawiinah No Objection Certificate an buaipui ang a, zaninah lirthei hmangin Mizoram panpui theih beisei a nih thu an sawi.

Kumin April thla hnuah Mizoramah Covid-19 vei thi mi pasarih an awm tawh. April 12-ah R Lalmuanzova, Kanan Veng, April 24-ah PC Zoram Sangliana, Kanan Veng, April 30-ah John Sapzinga, Champhai Vengthlang (Rahsi Veng) leh Lal­thlamuanzuala, Armed Veng South, May 2-ah J Rawna, Damveng, May 3-ah James Lianmawia, Kanan Veng, May 7-ah Lalmuanpuii, Ramhlun Venglai-te an thi a ni.

Delhi-ah hian tun hnaiah Covid-19 vanga Mizo thi pathum an awm a; April 27 chhunah Lalhlunpuii (31) d/o P Lalduhawma, Kanghmun South, May 1 zanah Eaward Vanlaldika (28) s/o H Thaliankapa, Champhai Vengthlang (Rahsi Veng) leh May 7 zingah H Lalnunhlima, Bawngkawnte an thi a ni.