KHAWTHLIR

Thisen pe
KṬP, Serchhip Kawnpui Branch chuan nimin khan thisen pek an huaihawt a, an member mipa 22 leh hmeichhia 13-te'n Serchhip District Hospital tan thisen unit 35 an pe. KṬP, Kolasib Hmarveng Bial pawhin ni thum, May 5-7 chhungin Kolasib District Hospital Blood Bank-ah thisen unit 25 an pe a, petute mipa 18 leh hmeichhia pasarih an ni.

Tanpuina hlan
AMC Ward-VIII councillor Christina Roluahpuii Sailo chuan nimin khan a bial chhunga veng pathum - Armed Veng, Armed Veng South leh Chite Veng LTF-te hnenah Rs. 5,000 ṭheuh leh hand sanitiser, disinfectant leh hmai tuamna eng emaw zat a hlân. Chite Vengah chuan community covid care centre din tum a nih vangin PPE a hlân a; an ward chhunga awm - 1st. Bn. MAP sub centre leh office ṭhenkhatah mask leh sanitiser a pe bawk.

Tlawh phal lo
Khanpui Branch YMA chuan thuchhuah siamin, Covid-19 léng mek avangin Chalfilh Vanzau Tourist Resort chu tlawh phal a nih loh thu an tarlang. Thuchhuah chu hripui léng laka khaw mipui an him theihna tura siam a ni thu sawiin, "Thuchhuah ngai pawimawh loa kal luite chungah hremna na tak lekkawh a ni ang," an ti.

Admit turte RAT tih vek tur
Civil Hospital, Aizawla rapid antigen test (RAT) kalpui dan turah Mizoram sorkar chuan nimin khan hriattirna a tichhuak a, damlo dah luh (admit) turte chu RAT hmanga enfiah vek tur a nih thu a tarlang. RAT man chu Rs. 200 a ni dawn a, main building gate cash counter bulah emaw, Casualty receiptionist-hnenah emaw pek theih a ni.

CM Relief Fund
Chief Minister's Relief Fund for Covid-19 ah nimin khan Khatla North Presbyterian Kohhranin Rs. 1,00,000, Kawlkulh Pastor Bial KṬP-in Rs. 5,000, Khamrang VC president Robert Lalramchuana'n September 2020 aṭanga May 2021 chhunga VCP lawmman a dawn Rs. 9,000 leh Zarkawt Branch KṬP-in Rs. 20,000 an thawh a; a vaiin Rs. 1,34,000 a ni.

Leivung paih khap
Aizawl district magistrate Dr Lalhriatzuali Ralte chuan, Aizawl Bypass Road (Falkland Veng - Silaimual) inkar kawngpui sirah leivûng leh bawlhhlawh paih phal a nih loh thu a puang. Thupek hi nimin khan tihchhuah a ni a, thla hnih chhung awh tur a ni.

Tui bill pek dan tur
District hrang hrang sorkar thuneitute chuan Covid-19 léng karah awlsam zawka mipuiin tui bill an pek theihna tur an ruahman a, online payment portal - www.phedmizoram.in/billpayment.php ah emaw, Paytm, PhonePe, GPay leh Amazon Shopping apps emaw hmangtein bill pek theih a ni.