Chanchinbumite frontline worker-a Puang turin Mizoram sorkar phût

ZPM Ṭhalai chuan thuchhuah siamin, thuthar thehdarhtute chu Covid-19 donaa a hmatawnga ṭang, frontline worker-a puang tur leh hamṭhatna awm thei ang angte pe ve turin Mizoram sorkar an phût tih an tarlang.

Mizoram mipui hnena chanchin thar leh hriat tur pawimawh petu chanchinbumite leh media lama thawkte chu hripui léng kárah an hna ṭhulh loa mipui rawngbawl hna thawktu an nih thu sawiin ZPM ṭhalaite chuan, "Chanchin thar theh darhna kawnga thawktute Covid dona kawnga a hma hruaitu (frontliner) anga pawm a, hamṭhatna awm thei ang angte pe ve zel turin Mizoram sorkar kan ngen a, hma la ngei turin kan phût bawk," an ti.

ZPM Ṭhalai chuan, Covid-19 hripui donaa hma táwngtu healthcare worker te, police te, Disaster Management lama thawk te, local/village task force-te inpekna leh hnathawhte chu a ropui an tih thu an tarlang bawk.