June, 2020-a pek tawh RTPCR Lungleia bun turin hriattirna tichhuak
Zodintluanga Ralte, MLA-in nikum June thlaa Civil Hospital, Lunglei tana RTPCR kháwl a pek tawh chu a rang lama bun turin Hospital and Medical Education director Dr T Lalhmangaihi'n May 7, 2021 khan Civil Hospital, Lunglei Medical Superintendent a hriattir.
Dr T Lalhmangaihi'n Medical Superintendent lehkha a thawnah chuan, 'RTPCR khawl Zodintluanga, MLA donate kha a hma thei anga Microbiology department, Civil Hospital, Lungleiah bun dan lo ngaihtuah tura ngen i ni,' tih a ni.
Hemi chungchangah hian Health minister Dr R Lalthangliana chuan thuthar thehdarhtute zawhna chhángin, Medical Superintendent chu a theih ang anga RTPCR bun dan ngaihtuah tura an tih thu a sawi.
Health Minister sawi danin, RTPCR khawl bun tur hian Medical Superintendent thuneihna ngawt a tâwk lo a, directorate-in khawl bun tura hriattirna an thawn a ni. Khawl bun hna chu microbiologist doctor-in an enpui ang.
Congress Legislature Party (CLP) leader Zodintluanga Ralte chuan, Lunglei Civil Hospital laboratory-a hman turin June 26, 2020 khan RTPCR khawl a pe a, a hun laia Lunglei District Task Force chairman V Lalsangliana, bawrhsap hnenah a hlân a ni.
RT-PCR khawl chu Lunglei Civil Hospital-a dah a nih hnu rei lo têah DC office-ah dah lêt a ni a, chumi hnuah sorkar thu angin damdawi-inah dah leh a ni. Nimin thleng khan hman lohin Civil Hospital, Lungleiah a la awm.
Vanglaini thudawn danin, Lungleiah hian April, 2021 khan Truenat laboratory a sample endik tur a lak khawm zingah a hun taka endik hman loh backlog ṭum sarih a awm a, May chhungin ṭum hnih a awm tawh.