Health Minister-in CCCC a tlawh

Health minister Dr R Lalthangliana chuan May 8, Inrinni khan Lengpuia Community Covid Care Centre (CCCC) atana hman mek Middle School-I a tlawh a, duty-te nen inkâwmin, an mamawh hrang hrang a pe.

Dr R Lalthangliana chuan, Lengpui chu Mizoram luhka pui ber pakhat a nih thu sawiin, "Ni tin phai lam aṭanga zin haw thlawhtheihna rawn ṭum ṭhinna hmun a nih avangin thawktute tan fimkhur a ngai zual. In hnathawh mek hi mihring hriselna leh nunna thàpa thawh ngai a nih avangin tlawmngaihna leh mihringpuite hmangaihna nen lo chuan thawh ngam chi a ni lo," a ti.

Union Health minister Dr Harsh Vardhan nen phone-a an inbiak thu sawiin Health Minister chuan, "India rama state 18 chauha pek tur Covid-19 hri káite enkawlna damdawi manto Tocilizumab, bûr khat Rs. 50,000 man chu bûr tam tak Mizoram tan pe turin ka nawr. Black market-ah phei chuan Rs. 1,50,000-te'n an zuar a ni," a ti a; Union Health Minister chuan Ministry of Petroleum hnuai aṭanga inpek tur a nih thu a lo hrilh avangin Petroleum Ministry-ah DO letter a ziah thu a sawi.

Health Minister hian CCCC enkawltute hnenah PPE kit, hand sanitiser, hmai tuamna, oxgygen concentrator, damdawi, thei leh pawisa a pe a; Nghalchawm leh Lengpui Airport-a Covid duty-te hnenah thei a pe bawk.