HSLC leh HSSLC result June thlaah puan ngei tum

Mizoram Board of School Education (MBSE) chuan Covid-19 léng karah an tum lâwk angin kumin June thlaah High School Leaving Certificate (HSLC) leh Higher Secondary School Leaving Certificate (HSSLC) Examination 2021 result puan ngei an tum.

Vanglaini palai zawhna chhangin MBSE chairman JH Zoremthanga chuan, Covid-19 hluar thar leh mah se, an hun ruat lâwkah HSLC leh HSSLC result puan theih ngei an tum thu a sawi a, "Result endiktu zingah Covid-19 vei an la awm lo. Chutih rualin, ṭhenkhat chu an chhungte leh mi dang vanga home quarantine ngaite an awm a, chu chuan kan hna a timuang deuh," a ti.

JH Zoremthanga chuan, hun ruatah result puan ngei tum mah se, hma hun erawh sawi lâwk theih a ni lo tih sawiin, "Tun dinhmunah chuan kan programme duan lâwk ang deuh chuan kan la kal zel thei rih," a ti a; Covid-19 darh nasa leh avangin result buatsaih kawngah harsatna lian tham an tawh loh thu a sawi.

HSLC 2021-ah hian zirlai 18,738 an exam a, April 1-15 chhung exam a ni a; June chawlhkar hmasa berah result tihchhuah tum a ni. HSSLC 2021-ah chuan zirlai 11,849 examin, April 6-30 chhung exam neih a ni a, result chu June thla chawlhkar hnihna emaw, chawlhkar thumnaah emaw tihchhuah tum a ni.