Covid vaccine lâk loh vangin Gas sem chawlhsan dawn
Mizoram Indane Distributors Association (MIDA) chuan thuchhuah siamin, Covid-19 laka invenna damdawi (vaccine) an la lâk ve loh avangin hripui kài darhtu an nih theih avangin vawiin aṭangin Mizoram pumah eirawngbawlna gas an sem tawh dawn rih lo tih an puang.
MIDA chuan, Covid-19 vei ni tin an pung zel tih sawiin, "Hetiang dinhmun hlauhawm taka kan din tâk avangin Mizoram pumah May 10, 2021 aṭang hian hun eng emaw ti chen chu gas dawr khârin, páwn lama kan gas sem pawh kan chàwl rih dawn. Kan consumer zawng zawngte'n min hriatthiam kan beisei," an ti.
Vanglaini palai zawhna chhangin MIDA hruaitute chuan, mipui nena indàwr nasa an nih avangin May 5, 2021 khan vaccine pe ve tura ngenna Health Minister hnenah an thlen tih an sawi a, "Chhànna kan dawng lo. Vaccine la loa kan kal ngaia kal reng hi kan dinhmun thlirin a him tawh loah kan ngai. Kan hnathawkte nupui fanau châwmte an ni a, risk kan la ngam tawh lo a ni," an ti.