KHAWTHLIR

National park leh Sanctuary khâr
Ministry of Environment, Forests & Climate Change thupek angin Mizorama national park leh sanctuary-te chu Covid-19 lêng avangin thu leh awm hma zawng khâr a ni. Researcher leh thawktute pawh protected area manager-te remruat huang chhungah chauh fimkhur taka chêt phal a ni a, field staff duty turte pawh Covid-19 negative dah tur a ni.

Ambulance hlân
Minister of state K Lalrinliana chuan a bial chhunga Bairabi Primary Health Centre (PHC)-a hman atana MLA Local Area Development Scheme sum Rs. 5,77,190 hmang a lei ambulance chu May 8, Inrinni khan a hlân.

CM Relief Fund pe
Khatla South Presbyterian Kohhran chuan May 8, Inrinni khan Chief Minister's Relief Fund for Covid-19 ah Rs. 1,00,000 an chhûng lut.

Rifle pakhat man
Mizoram Police leh Assam Rifles-te chuan nimin khan Chhinga Vengtharah silai an man. Assam Rifles tarlan danin, silai an man hi .303 rifle a ni a, a neitua puh mi pakhat pawh man nghalin, Aizawl Police Station-ah hlan a ni.

Tanpuina hlan
Aizawl Two Wheeler Taxi Association (ATTA) chuan Inrinni khan Covid-19 hri vei tamna - Melthum, Damveng, Bethlehem Veng, Bethlehem Vengthlang, Dawrpui, Chanmari, Bawngkawn, Kanan Veng leh Lengpui task force-te hnenah ṭanpuina Rs. 5000 ṭheuh an hlan. Hripui vei tam vanga inkhàrkhip mek Nghalchawm khaw hnenah alu, dailuah leh tél eng emaw zat an pe bawk.

MLA-in tlawh
Aizawl West-III bialtu MLA VL Zaithanzama chuan Inrinni khan a bial chhunga Maubawk leh Lawipu LTF duty-te a tlawh a, pawisa leh hand sanitiser a hlan. Covid-19 vei hmuh tharte awmna tura buatsaih HSS Girl Hostel, Lawipui Veng a tlawh nghal bawk. VL Zaithanzama chuan, hripui lêngin a vanglai a thleng dawn nia a lan thu sawiin, "Mipui kan fimkhur leh zual a ngai a ni," a ti.

Containment area
Khawzawl Kawnzar venga Farmers’ Hostel, KVK Complex chu Covid-19 veite enkawlna atan hman a nih avangin Khawzawl DC Zothanmawia chuan nimin khan KVK Complex chu contaiment area-ah a puang.

SRH-ah mi 11-in Ventilator hmang
State Referral Hospital-ah nimin tlai dar 5 thleng khan Covid-19 vei mi 111 enkawl mek an ni a, an zinga mi 11 chu ICU-ah ventilator nen enkawl an ni. SRH-ZMC Bulletin tarlan danin, SRH-ah hian nimin khan mi pasarih dah luh an nih laiin mi paruk chhuahtir an ni a, mi pahnih an thi. ICU-ah mi 13 awmin, an zinga 11 chu ventilator hmanga enkawl an ni a, ward-ah mi 98 awmin, an zinga 22 chu oxygen pek mek an ni.

Kohhranin tanpui
Chhinga Veng Presbyterian Kohhran chuan hripui léng vanga inkhuahkhirhna leh inkhârkhipna kalpui a nih avangin Chhinga Venga chhungkaw 33 hnenah ṭanpuina an hlân. Thu dawn danin, Chhinga Veng Kohhran hian chhungkaw 33 hnenah Rs. 5,000 ṭheuh an pe a, Rs. 1,65,000 an sem chhuak a ni.