Total lockdown ṭan
Mizoramah tukin zing dar 4 aṭang khan total lockdown kalpui a ni a, May 17, kar leh Thawhṭanni zing dar 4 thleng a awh ang.
May 10-17, 2021 chhung Mizorama inkhàrkhip kalpui tur chungchangah hian State Disaster Management Authority hnuaia State Executive Committee chairman Lalnunmawia Chuaungo, chief secretary chuan May 7, 2021 zan khan thupek a chhuah a; inkaihhruaina pawh tihchhuah nghal a ni.
Total lockdown inkaihhruaina, Standard Operating Procedure (SOP) zinga a tam zawk chu May 3, 2021-a inkaihhruaina tihchhuah tawh nen a inang a, tihdanglam a awm nual bawk.
Aizawl leh district khawpui chhungah zan dar 7 aṭanga zing dar 4 inkar curfew puan chhunzawm a ni a; mahni in/compound chhuahsan phal a nih loh bakah, in khata chhungkaw hrangte pawh intlawhpawh phal a ni lo.
Inkaihhruaina tharah hian AMC leh district khawpuia LTF/VTF aṭanga phalna (movement permit) lak ngai zingah - hospital, nursing home, clinic, laboratory, OST centre, ART centre, blood bank, damdawi dâwr, veterinary hospital, dispensary, clinic, zoo,hatchery, bank, non-banking financial institution, insurance, ATM, post office, petrol/diesel filling station, LPG storehouse, Covid-19 duty-te hman taxi leh rental motor, fair price shop/ration dawr pan turte telh thar a ni.
Inkaihhruaina langsar zualte
# Lirthei hmanga Mizoram lutte leh Aizawl pêla district danga kal turte chu châwl loin khung hranna tur hmun pan tur a ni.
# Remchan lohna avanga lirthei thlak a ngaih chuan private motor uluk taka daidanna siamin emaw, Transport department empanelled motor-te emaw hmangin kal chhunzawm tur.
# Mahni chenna khua chhuahsana zin chhuah phal a ni lo.
# Chhiat tawh leh dam lohna (medical emergency)-a mahni khua chhuahsana zin a ṭul chuan VTF/LTF hriatpuina lehkha lak tur.
# VTF/LTF lehkhaah kal ṭanna leh zinna/kalna tur hmun, zin chhan, ni leh darkarte ziah lan tur a ni.
# Lo leh huan lama hnathawh, quarry-a lung lak adt. khuahkhirhna awm loa kalpui theih a ni a, AMC area leh district khawpuia an veivah khap a ni.
# Ningani (Thursday)-ah chauh eichawp, thlai, chawhmeh leh sa zawrhna dawrte hawn phal a ni ang.
# Dawrte chu tlai dar 5 thleng bak hawn phal a ni lo.
# LTF/VTF-te’n SOP zawm a nih theih nan ruahmanna an siam ang.
# Mizoram sorkar hnuaia office zawng zawng khâr a ni ang.
# DMR, HFW, Home (Police, Fire & Emergency Services, Home Guard & Civil Defense), Finance & Treasury, district administration, Civil Aviation leh IPR-te chu Covid-19 dona leh hna ṭul bikah an veivâk thei.
# Legislative Assembly chuan an kal dan tur a hranpain an ruahman ang.
# High Court thuchhuak angin Judiciary/Court-a hnathawkte an kal thei.
# Office kal turte’n identity card leh detailment order an keng tur a ni.