Tlawngah tui pump sèn loh a awm : Ṭhalah pawh litre maktaduai 34 a pump theih - Congress Ṭhalai

Mizoram Pradesh Youth Congress Committee (MPYCC) hruaitute chuan May 7, Zirtawpni khan Tlawng lui a hmunah an enfiah a; tui pump sèn loh a awm tih an finfiah thu an puang.

MPYCC thuchhuah chuan, Tlawngah tui a kàm avangin tui pump tur a awm meuh lo niin a tlángthang tih tarlangin, "A hmunah kan tlawh a, tui hi pump sèn loh a awm tih kan finfiah. Ṭhál tui tlem lai ber pawhin Aizawl châwmtu Tlawng lui Reiek kàiah ni tin tui litre maktaduai 34 pump chhuah tur a awm reng a ni tih thu pawh kan dawng," an ti.

MPYCC president Dr Lalmalsawma chuan, Tlawng lui chu Reiek kai lei chhakah Raw Water Pump-I awmin, chumi zâwnah chuan tui khuahna (weir) metre 4 (ft. 13 vel)-a sángin khuah a nih thu sawiin, "Hei hian a chhak lam km. 2 dawna thui Tlawng lui hi engtik lai pawhin a khuap tling reng a ni. Raw Water Pump-II tuikhuah an siamah pawh tunah hian tui pump tur a awm reng," a ti a; tui pump tur awm lo khawpa a kàm ngai loh thu a sawi.

PHE department-in November, 2020 aṭangin harsatna neuh neuh an tawh avangin ni 26 chhung tui an pump thei lo nia sawiin Dr Lalmalsawma chuan, "Hei hian Aizawl khawpui tui sem a tibuai niin kan hria. Hetianga tui pump thei lo khawpa PHE-in harsatna an tâwk hnem lutuk hi a enkawltu minister inthlahdah vang leh a ngaihven tâwk loh vang a ni," a ti.

Congress ṭhalaite chuan, Congress sorkar laiin tuiah harsatna a awm ve ṭhin thu sawiin, "Mahse, PHE leh a changtu minister-te'n theihtâwp an chhuah a, P&E department-in nasa takin an ṭawiawm bawk a, kan phâk tâwkah kan ziaawm a ni," an ti a; Congress sorkar lai chuan tui sem hun thlengin SMS hmanga inhriattir ṭhin a nih thu an tarlang.