Hripui léng donaa sorkar pui turin kan inpeih - ZPM

ZPM party chuan thuchhuah siamin, Covid-19 donaa sorkar pui turin an inpeih thu an tarlang a; hripui léng laka Mizoram a him theihna atana sorkar thuchhuak zâwm turin mipui an sáwm nghal.

ZPM chuan, Mizoram sorkarin kum 18-14 inkarte’n Covid-19 vaccine a thlâwna an lâk theihna tura ruahmanna a siam te, ventilator ṭha chi 35 lei a tum leh Covid-19 vei, Mizoram State Health Care Scheme (MSHCS) hnuaia inziak lut, sorkarin enkawlna tur a buatsaih hmuna enkawlte inenkawlna senso Rs. 2,00,000 thleng an bill theih tura hma a late chu lawmawm an tih thu an tarlang a ni.

Covid-19 donaah tih theih leh ṭangkaina an nei a nih chuan sorkar pui tura an inpeih reng thu sawiin ZPM chuan, “Harsatna nasa zawk hmachhawn thei kan nih hre renga all party meeting pawh ko hreh lo tur leh ngaihtuahna zau zawk púa ṭan la zel turin Mizoram sorkar kan ngen a ni,” an ti.

ZPM party chuan, hripui léng laka mipui an him theihna atan sorkarin theihtawp a chhuah mek thu tarlangin, “Kohhran, NGO leh political party hrang hrang bakah, mimal ṭhahnemngai zualte pawhin keimahni zâwn ṭheuhah theihtawp kan chhuah tláng vek a ni,” an ti a; hripui laka him turin sorkar thuchhuakte ṭha taka zâwm a, mi thiam zawkte thuràwn pawm thiam a ṭul thu an sawi bawk.