Sports minister-in a biala CCCC 2 tlawh

Minister of state Robert Romawia chuan Inrinni khan a bial chhunga Chhinga Veng leh Chite Venga covid community care centre (CCCC) siam thar a tlawh a; Covid-19 vanga a biala harsatna tâwkte chhawmdawlna atan MLA fund aṭangin cheng nuai 10 ruahman a nih thu a sawi.

Robert Romawia chuan, hripui léng karah dam khawchhuah a pawimawh ber tih sawiin, “Sorkarin inkaihhruaina a siamte ṭha taka zâwm turin LTF kaltlangin mipui ka chah nawn leh a ni. Mizoram sorkarin Covid-19 veite harsatna leh mamawhna hriaa mi pakhat tan Rs. 2,00,000 sorkar pawmpui Covid veite enkawlnaa awmte senso an bill theih tura a ti hi a lawmawm. State dang sorkarin Covid-19 veite an enkawl dan leh Mizoram sorkarin a enkawl dan chu a inang lo hle,” a ti.

Covid-19 do chungchanga Chief Minister leh Health Minister hmalakna ropui a tih thu sawiin Robert Romawi chuan, department hrang hrang, kohhran, tlawmngai pawlte leh mipui ṭanhona chu India ram pum huap pawha chhuan tham a tlin thu a sawi bawk.

Aizawl East-II MLA hian an bial chu dawrkai leh ni tina bazara eizawng tamna a nih avangin lockdown leh a kaihhnawih harsatnate an tuar nasa hle tih sawiin, “MLA fund aṭangin Covid-19 léng thar leh dona atan leh mi harsa zualte’n ei leh in an tlakchham loh nan ṭanpuina turin cheng nuai 10 ruahman a ni,” a ti a; cheng nuai 10 hman dan tur chu veng tin LTF nen an sawiho tur thu a sawi.

Aizawl East-II huam chhungah Chhinga Venga KVM High School leh Chite Venga Horticulture Centre chu sorkarin CCCC atan a hmang dawn a, cheibâwl mek a ni.