Kawng siam danah YMA an lawm lo

Saitual leh Saichal inkar kawng siam mek chu May 9, Pathianni khan YMA Sub-Headquarters, Saitual aiawhin Chawnpui Branch hruaitute'n an endik a; kawng siamtu ELTY-in kawng an siam lai chu a ṭha tâwk lo hleah an ngai.

YMA hruaitute hian Saitual aṭanga Saichal lam km. 6-7 vela kawng siam chu a hmunah an en a; kut lâwng pawha khawih chhiat awlsam taka siam a nih thu sawiin, fûr khat pawh a daih lo theiah an ngai.

Vanglaini palai zawhna chhángin Chawnpui Branch YMA hruaitute chuan, "Hnathawh an uluk lo a, engineer-te'n an vil uluk lo a ni ber. Hetiang hi chu rang taka chhe leh mai tur a ni tih a chiang reng. An hnathawh dan hi kawng chhêm fai ṭha loin vaivut chungah bitumen an luan mai a ni. Hnuai lamah lo man bettu tur a awm loh avangin kut lâwng pawhin a kheuh khawh mai mai theih a ni," an ti.

January 2021 khan Lengteng bialtu MLA L Thangmawia chuan Saitual leh Saichal inkar kawng siam chu a hmunah a lo endik tawh a; kawng enkawltu NHIDC Ltd. leh contractor-te chu a nih dan tur ang taka hna thawk turin a hrilh.

Saitual-Saichal-NE Bualpui kawng km. 34.33-a thui hi October 31, 2006 khan North Eastern Council aṭanga sum hmuh hmanga siam ṭan a ni a; kawng siam nan cheng nuai 3343.60 ruahman niin, kum 2011 khan sorkarin revise estimate siamin cheng nuai 863.63 hmuh leh a ni.