Mizoramah darkar 22 chhungin Covid-19 vei mi panga an thi

Mizoramah darkar 22 chhungin Covid-19 vei mi panga an thi. Sorkarin Mizorama Covid-19 vei thi a chhinchhiah tawh zat chu 22 a ni.

Covid-19 vei State Referral Hospital (ZMC)-a enkawl lai Lalthianghlimi (68) w/o VL Nghaka, Kanan Veng, Aizawl chu nimin zing dar 5 khan a thi a, nimin chhun dar 12 khan vui a ni. Amah hi Covid-19 positive a ni tih April 21-ah hmuh chhuah niin, April 23-ah SRH-ZMC-ah dah luh a ni a, April 25 aṭangin ICU-ah enkawl a ni.

Nimin vêk, chawhma dar 10:30 khan Covid-19 vei SRH-ZMC-a enkawl lai Thangluaia (58) h/o Ṭuanremi, Bawngkawn a thi bawk a, nimin chawhnu khan YMA Hall-ah vui a ni.

Thangluaia hi rílpui cancer a ni a, phai lama an inenkawl zo April 27, 2021-a an rawn haw chu Lengpui Airport-ah hripui vei a ni tih hmuh chhuah niin, CCC-ah enkawl a ni phawt a, chumi hnuah SRH-ah enkawl leh a ni.

May 9, Pathianni khan Covid-19 vei SRH-ZMC-a enkawl lai mi pathum an thi. Chhun dar 1-ah Bawihluta, Thakthing Veng leh tlai dar 3:50-ah Lalneihliana (87), Bethlehem Vengthlangte an thih hnuah, zan dar 6:20-ah Lallunghnema (86) h/o Kap­ṭhiangi, North Lungpher, Saitual district chu a thi ve leh.

N. Lungpher aṭanga thu dawn danin, Lallunghnema hi Covid-19 positive a ni tih May 3-ah hmuh chhuah a ni a, SRH-ZMC-ah dah luh nghal a ni. A ruang hi Pathianni zan khan SRH-ah dah rihin, nimin zing khan an khua panpui a ni a, an inah luhpui loin thlanmualah vui nghal a ni.

Lallunghnema nupui Kap­ṭhiangi pawh Covid-19 vei mek niin, Saitual CCC-ah enkawl a ni a, a dinhmun a ṭhat loh deuh avangin Pathianni tlai khan SRH-ZMC panpui a ni.

May 9, Pathianni chhun dar 1 leh nimin chawhma dar 10:30 inkar, darkar 22 chhungin Mizoramah Covid-19 vei thi mi panga an awm a; Pathianni kha Mizoramah hripui vei thi an tam ber ní a ni.

Sorkar chhinchhiah danah, Mizorama Covid-19 vei thi zat chu mi 22 an ni ta a; Covid-19 vei enkawl lai May 7, 2021-a thi Lalmuanpuii, Ramhlun Venglai chu Covid-19 vei thi zingah telh a ni lo. May 5, 2021 tlaia CCC aṭanga zuangthlaa thi zui ta PC Laldingliana (38), Tlabung pawh Covid-19 vei thi zingah chhiar tel a ni lo bawk.

Mizorama Covid-19 vei thi hmasa ber chu Lalsangkhuma (66) h/o Lalthlamuani, Dawrpui a ni a, October 28, 2020-ah SRH-ZMC-ah a thi.

Kum 2020 chhung khan Mizoramah hripui vei mi pariat an thi a, kuminah mi 16 thi tawhin, an zinga pahnih chu Covid-19 positive thi zingah chhiar tel an ni lo.

Kuminah hian January, February leh March thlaah mi pakhat ṭheuh an thi a, April thlaah mi pali an thi a, May thlaah ni 10 chhungin mi pakua an thi tawh. Mizorama Covid-19 vei thi tawh zinga mi pali chu Kanan Veng, Aizawl mi an ni.