Mizorama kum 18-44 inkarte hnena Covid vaccine pek dan tur ruahman

Health & Family Welfare (HFW) department chuan Covid-19 laka invènna damdawi (vaccine) pek dan tur chungchangah nimin khan thuchhuah a siam a; kum 18-44 inkarte pek tur vaccine a lo thlen huna pek hmasak tur list a tichhuak.

Kum 18-44 inkarte vaccine tur chu sorkar laipuiin a thlâwna a pek tawh dawn loh thu tarlangin health department chuan, "Kum 18-44 inkarte vaccine pe tur hian state sorkar chuan a lei a ngai tawh a, sorkar laipuiin a thlawna min rawn pek hi kum 18-44 tan hman theih a ni lo," a ti.

HFW department chuan, Mizoram sorkarin kum 18-44 inkarte pek tur Covishield chu a siamtu Serum Institute hnenah a chah mek thu a tarlang a; vaccine pek theih hun nghak hrâm hrâm turin kum 18-44 inkarte a ngen a ni.