Kolasib dist.-ah ambulance a indaih lo
Mizorama state dang nena inkalpawhna tamna ber district - Kolasib district-ah ambulance hman tur an indaih lo hle a, screening point-a Covid-19 vei hmuh chhuah a nihin enkawlna hmuna dah turin hun rei tak nghah a ngai ṭhin.
Kolasib aṭanga Vanglaini thu dawn danin, Kolasib district-ah medical lamin ambulance hman tlak pakhat chiah an nei ṭhin a; mahse, tun hnaiah Kolasib bialtu MLA K Lalrinliana'n Bairabi-a hman turin ambulance a lei a, Pathianni khan Bairabi thlenpui a ni.
Kolasib district-ah hian Assam aṭanga Mizorama luhka pali - Vairengte, Bairabi, Phaisen leh Saiphaiahte a awm a; chu'ngah chuan Mizorama lutte enfiahna screening point a awm ṭheuh a, Mizoram lut turte'n Covid-19 an vei leh vei loh endik ṭhin a ni.
Screening point-ah Covid-19 vei hmuh chhuah a nihin enkawlna hmun lama hruai turin ambulance nghah a ngai ṭhin a, ambulance pakhat chiahin a vil avang leh kár inhlat tak takte a nih avangin hun rei tak chhung nghah a ngai ṭhin.
Hetih lai hian, Serlui bialtu MLA Lalrinsanga Ralte chuan ambulance pahnih Vairengte damdawi-in leh Bilkhawthlir damdawi-ina hman turin tun hnai khan a lei nia thu dawn a ni bawk.