KHAWTHLIR

Vawiinah Duhoma lâk luh a ni dawn
April 17, 2021 Serchhip bial MLA by-election-a thlan tlin ZPM candidate Lalduhoma chu vawiin chawhma dar 12 hian Assembly speaker Lalrinliana Sailo-in MLA atan a la lut dawn. By-election-a vote tlate chu May 2 khan chhiar a ni a, Lalduhoma'n vote 8,269 hmuin, amah hnaih bertu MNF candidate Vanlalzawma chu vote 2,950-in a hneh a ni.

Thisen pe
Nimin khan Champhai College NCC cadet leh NSS unit-te chuan Champhai District Hospital-ah thisen pek an huaihawt a, mipa 36 leh hmeichhia pariatte'n thisen unit 44 an pe. KṬP, Hmunhmelṭha Branch pawhin nimin khan Champhai District Hospital-ah thisen unit 12 an pe a, petute mipa pakua leh hmeichhia pathum an ni.

CM Relief Fund pe
Chief Minister’s Relief Fund for Covid -19 ah nimin khan Mizoram Baptist Kohhranin Rs. 10,00,000, Seventh Day Adventist Mizo Conference-in Rs. 2,00,000, Kulikawn Presbyterian Kohhranin Rs. 2,00,000 leh Mamon Majumdar, Kulikawn, Aizawl-in Rs. 1,00,000 an thawh a; a vaiin Rs. 15,00,000 a ni. Nimin thleng khan CMRF-ah Rs. 22,94,29,954 a lut tawh a, Rs. 21,33,60,970 hman tawh niin, la hman loh Rs. 1,60,68,984 a awm.

Tanpuina tur hlân
Jampui Hill Mizo Convention chuan Mizorama Myanmar ráltlânte ṭanpuina atan nimin khan MZP hnenah Rs. 1,00,000 an hlân a; Royal Enfield Zawlbuk (REZ) pawhin ráltlânte ṭanpui nan sum ṭhahnem tak MZP-ah an hlân bawk. MZP chuan, "Tlang hrang hranga awm Zo fate'n unau hmangaihna kan lantir zel hi ropui kan ti tak zet. Ṭanpuina sumte hi remchang hmasa berah sem chhuah a ni ang," an ti.

Dawnfawh pe
Lengteng bialtu MLA L Thangmawia chuan nimin khan a bial chhung khaw hrang hrangte dawnfawh thar chu ZMC hnenah a hlan. L Thangmawia chuan, a thilpek chu beitham mah se, damlo enkawl hautakzia leh an inpekna thûkzia an hriatpui vanga duhsakna thilpek a ni tih a sawi.