Lungleiah TrueNAT khawl dah belh

Civil Hospital, Lunglei laboratory-a hman turin nimin khan Health department chuan Molbio TrueLab Uno Dx kháwl pakhat Aizawl aṭangin an dah.

Khawl hi nimin tlai dar 4 khan Lunglei Civil Hospital thlenpui a ni a, Civil Hospital medical superintendent Dr SR Ngurchamliana chuan, khawl chu laboratory-ah daha hman nghal tur a nih thu a sawi.

Sorkar thuchhuah tarlan danin, Lunglei Civil Hospital laboratory-ah hian Truenat Quattro khawl, ṭum khata swab sample pali endik thei leh Molbio TrueLab Uno Dx khawl, ṭum khata sample pakhat endik thei pakhat ve ve a awm. June 12, 2020 aṭangin swab sample endik ṭan niin, May 9, Pathianni thleng khan sample 8,820 endik a ni tawh. Endik zinga 408 chu Covid-19 positive a ni.

Lunglei Chanmari-a CMO office hlui leh Civil Hospital Kiosk-ah Rapid Antigen Test leh sample lak hna kalpui reng a ni a, sorkar rate angin Truenat hmanga sample endik man chu Rs. 1,000 niin, RAT hmanga endik man chu Rs. 200 a ni.

May 3, 2021 aṭangin Christian Hospital, Serkawnah RAT kalpui ṭan a ni bawk a; sample endik man chu working hour (9:30 am - 4:00 pm)-ah Rs. 500 leh working hour piah lamah Rs. 600 a ni.