Dan leh thupek kenkawh dan sawiho

Mizoram Police deputy inspector general (Nothern Range) Lalbiakthanga Khiangte hoin May 9, Pathianni khan Aizawl SP conference hall-ah police hotute'n Covid-19 vênnaa police hnathawh dan an thlirlet a, total lockdown kaihhruaina an zirho bakah, dan leh thupek kenkawh dan tur an sawiho.

Lalbiakthanga Khiangte chuan, police duty-te chu dan anga dik leh huaisen taka kal tur leh phalna neite chu an phalna uluk taka en chiang a, phalna nei lote chungah dan anga hma la turin a chah a, "Mizoram, a bikin Aizawlah Covid-19 kái thar ni tina pung tam reng tirêm turin police-te'n mawhphurhna leh pawimawhna sang tak kan nei a ni," a ti a, theihtawpa ṭang turin a fuih.

Sorkarin Covid-19 darh zel tur vênna atana total lockdown guideline, The Mizoram (Prevention and Containment of the Spread of Covid-19) Act, 2020 leh Aizawl DC-in curfew order a tih chhuahte chu a nihna ang taka kengkawh turin a chah a, "Mipui himna tur leh hripui darh zau zel tur vênna atana pawimawh a nih avangin fimkhur taka duty a ṭul," a ti.

Ṭhutkhawmah hian Aizawl SP C Lalruaia, Aizawla Covid-19 donaa police duty-te viltu additional SP te, zonal officer, SDPO leh Aizawla police station OC-te an tel a ni.