PHE-in theihtawp an chhuah - MNF

MNF party chuan thuchhuah siamin, mipuiin tui harsatna a nneih lohna turin PHE department leh a changtu minister-in theihtawp an chhuah niin an tarlang a; PHE minister Tawnluia leh department hotute fakawm an tih thu an puang.

MNF thuchhuah chuan, "Tlawng tui awm zat uluk taka vil reng a, tui tlêm chhung pawha Aizawl mamawh zualpui phuhru tura tui renchem dan ruahmanna ṭha tak siam theitu PHE Minister leh department engineer-te an fakawm tak zet a ni," an ti.

Tuia Aizawl châwmtu Tlawng lui chu ṭhálah a kám nasa hle ṭhin nia sawiin, fûr leh ṭhála Aizawl mipui nuai li vel tui mamawh a pangngai deuh reng nia sawiin MNF chuan, kum tluanin Aizawl pumping scheme phase 1 leh 2-te'n ni tin tui (raw water) litre nuai 35 vel an hîp chhuak ṭhin niin an tarlang.

MNF tarlan danin, kumin ṭhálah kum dang aiin Tlawng lui tui a tlem a, a tlem lai ber April 19-ah Tlawnga tui luang chu ni khatah litre nuai 31.46 a ni a, chu chu Aizawl mamawh aia tlem a ni. April 19-30 inkarah Tlawng lui tui luang laia Aizawl tana hîp chhuah a tam zawk avangin Tlawng tuikhuah a phai hret hret. Ruahsur zeuh zeuh leh April 30 tlaia ruah tam tham tak sûr avangin May 1 aṭangin tui a tam leh deuh a, May 1 aṭangin hìp chhuah sên loin tuikhuahah a luang liam leh tawh a ni.

MNF chuan, khawkhéng vanga Tlawng tui a tlem lai leh Aizawl tui mamawh pe tura rim taka thawktute harsatnate a hmuna enpui duh si loa sawisel tur ringawt zawngah Congress ṭhalai an puh a, "Ruahtui tlak hnu leh Tlawnga tui a tam leh hnu May 7-a sawisel tur ringawt zawnga thla la a, Tlawng lui tuikhuah an tlawh leh thu dik zîktluak lo an vawrhdarh hi an hriat chian loh vang a ni," an ti a; MPYCC chet dan chu an dem thu an tarlang.