Sorkar laipuiin VC-te hman tur Cheng vbc. 13.8 a pe chhuak

Sorkar laipuia Ministry of Finance chuan May 8, 2021 khan state 25-a rural local body (RLB)-te hman turin kum 2021-22 atan first instalment cheng vbc. 8,923.8 a pe chhuak. Mizoram hnenah cheng vbc. 13.8 pek a ni a, VC-te hnena sem tur a ni.

Finance department aṭanga Vanglaini thu dawn danin, Ministry of Finance-in sum a pek chhuah chu 15th Finance Commission-in RLB-te tana a ruahman a ni a, a hranpaa thil ruahman a ni lo. Mahse, Covid-19 a lèn nasat avangin VC-te'n an huam chhunga hmasawnna hna an thawhna tur a nih piah lamah, an duh chuan Covid-19 dona atan an hmang thei dawn a ni.

Mizoramah chuan sum dawn a nih hunah VC-te nodal department Local Administration department hnenah pêk chhawn a ni dawn a, LAD-in VC-te hnenah a sem ang. RLB fund sem sawm dan tur chu khua/veng zau zawng leh mihring awm zat azirin bituk sa vek a ni. RLB tana tih a nih avangin urban local body (local coucil)-te'n an chang ve thei dawn lo.

May 8-a sum pek chhuah hi kum 2021-22 atana Mizoram budget tura telh sa a ni a, a hranpaa Covid-19 dona atana sorkar laipuiin a pek a ni lo. VC-te'n an huam chhunga hmasawnna hna an thawhna tura tih a ni a, chutih rualin, hripui léng avangin an duh chuan Covid-19 dona atan an hmang thei bawk ang.

Ministry of Finance tarlan danin, RLB sum pek chhuah hi hmarchhak state pariat zinga paruk chan tur a lang a; Arunachal Pradesh-in cheng vbc. 34, Assam-ah vbc. 237.2, Manipur-in vbc. 26.2, Tripura-in vbc. 28.2, Mizoramin vbc. 13.8 leh Sikkim-in vbc. 6.2 an dawng dawn a ni. Meghalaya leh Nagaland chan tur tarlan a ni lo.

Ministry of Finance chuan RLB sum first instalment hi June 2021-ah pek chhuah tur a nih thu an tarlang a, "Covid-19 léng mek avangin a hun hmaa pek chhuah a ni," a ti.