Lungleiah RT-PCR bun dawn vangin lâwm

ZPM Southern Headquarters, Lunglei chuan thuchhuah siamin, Civil Hospital, Lungleia RT-PCR khawl hman theih tura bul ṭan a ni dawn ta chu thinlung taka an lawm thu an tarlang.

Lunglei ZPM chuan, COVID-19 hripui thawh hnihnain Mizoram a nuai a, hri kai thar an pung chak hle tih sawiin, "Hetiang taka kan buai a, lockdown puan nawn ulh ulh a ngaih bawk laiin Lunglei khawpui leh a chhehvel khuate tana hman theih tura sorkarin RT-PCR khawl bunna tura order a siam ta hi lawmawm kan ti tak zet a ni," an ti.

Lungleiah Truenat Quatron chiah hman mek a nih thu sawiin Lunglei ZPM chuan, "COVID hri kái thar pawh finfiahna kawngah duh angin hna a thawk chak thei loin kan duhkhawp lo em em a, kan vice president Pi Lalrinpuii phei chuan Prime Minister hnenah hial a lo thlen tawh a ni," an ti a; RT-PCR kháwl chu a rang thei ang bera hman a nih theih nan bawhzui zel turin sorkar an ngen a ni.