Contract chawlhsan turin ngen
ZPM vice president K Sapdanga chuan nimin khan thuchah ti chhuakin, Covid-19 hripui vanga lusún chhungkuate an tawrhpui thu a tarlang a; hripui vanga ram sum dinhmunin harsatna vàwrtàwp a thlen avangin contract hna lam chawlhsan turin sorkar a ngen nghal.
K Sapdanga chuan Covid-19 vanga thi chhungte an tawrhpui thu tarlangin, "Covid hripui vanga lusún chhungkua zawng zawng thinlung takin kan tawrhpui a, damlo enkawl mek zawng zawng ṭha taka an dam chhuah leh theihna turin duhsakna sang ber kan hlân a ni," a ti.
Covid-19 vanga ram dinhmun a chhiat thu sawiin ZPM Vice President chuan, "Hripui vanga thihna kan tawh mawlh mawlh lai leh ram sum dinhmunin harsatna vàwrtàwp a thlen tâk hial laiin, Mizoram sorkar pawh sum siamna remchang contract hna lam chawlhsan tawh turin kan ngen a ni," a ti a; a loa awm theih sum sênna rêng rêng titawp ngam tur leh hripui laka mipui himna dah pawimawh ber turin sorkar a ngen.