MLA leh councillor-te che chhuak

Aizawl South-II bialtu MLA Lalchhuanthanga chuan nimin khan a bial chhunga local task force hrang hrangte a tlawh kual a, bialtu councillor Malsawmzuala Ralte-in a ṭawiawm.

Lalchhuanthanga chuan, a biala LTF-te chu hripui dona kawnga an thawhho zel dan tur a sawipui a, eibàr lama harsatna nei an awm chuan amah hrilh zel turin a chah. Aizawl South-II huam chhungah hian nimin dinhmunah chuan, Covid-19 vei mi 46 an awm mek a ni.

Aizawl South-I bialtu MLA C Lalsawivunga leh AMC Ward XVI councillor R Lalawmpuiite pawhin May 8, Inrinni zing khan an bial chhung tlawh kualin, inkhàrkhip vanga harsatna tâwk chhungkuate ṭanpuina an pe. Inrinni vêk khan AMC Ward XIV councillor Ramthanzauvi pawhin Khatla South LTF duty-te a tlawh a, mipui hnena sem turin Rs. 14,000 leh ei leh in tur chi hrang hrang a hlàn a ni.