MLA atan Lalduhoma lâk luh a ni : Pathianin ro a rél tawh a, bial mipuite'n thutlukna an siam tawh, inngaidam tawn ang u - Duhoma

Serchhip bial Assembly constituency by-election-a thlan tlin Zoram Peoples' Movement (ZPM) candidate Lalduhoma chu nimin khan MLA ni turin rinawmna thu tiamtira lâk luh a ni. Lalduhoma chuan, MLA aṭanga bàn a nih chungchangah inngaihdam tawn vek a duh thu sawiin Pathianin ro a rel tawh a, bial mipuite'n thutlukna an siam tawh, a ti.

Lalduhoma lak luhna inkhawm hi Assembly Annexe conference hall-ah buatsaih a ni a, Covid-19 léng avangin mi tlemtê chauh tel tura sàwm an ni. Chhun dar 12-ah lak luh inkhawm ṭan a ni a, Assembly speaker Lalrinliana Sailo chuan Lalduhoma chu rinawmna thu tiamtirin MLA atan a la lut a ni.

Lâk luh a nih hnua thuthar thehdarhtute'n an kawmnaah Lalduhoma chuan, by-election awm chhan leh inpuhmawhnate theihnghilh vek tawh ni se a duh thu a sawi a, "Mi thlahthlam ngai lotu Pathian, bial mipui leh mi ṭanpuitute zawng zawng chungah lawmthu ka sawi a ni," a ti.

Lalduhoma chuan, by-elec­tion buatsaih chhanah dik zawk leh thiam zawk nih inchuh tawh loh ni se a duh thu sawiin, "Pathianin ro a rél tawh a, bial mipuite'n thutlukna an siam tawh," a ti a, by-election neih chhan chu sawi zui tawh loh ṭula a hriat thu a sawi.

A chunga thil thleng avanga inchhîr, rilru ná, inthiam lo leh thinrim an awm palh thei tih sawiin Duhoma chuan, "Chu'ng zawng zawng chu an rilru dam vek se ka duh. Kan zavaiin inngaidam tawn ila, Mizoram hi dam se. Tun aṭang chuan mahni zâwn ṭheuh, hna ṭheuhah Mizoram tungding turin rim takin i thawk ang u," a ti.

Assembly speaker Lalrinliana chuan Lalduhoma a lak luh zawh­ah hian Mizoramah Mizo National Front MLA 27, Indian National Congress MLA panga, Bharatiya Janata Party MLA pakhat, Zoram Peoples Movement MLA pakhat leh independent MLA paruk an awm thu a puang.

MLA lâk luhna inkhawmah hian MLA zingah MNF aṭangin Lalchamliana, Lalchhandama Ralte leh Dr ZR Thiamsanga-te an tel a; INC aṭangin Zodin­tluanga Ralte, KT Rokhaw leh Lalrindika Ralte-te an tel. ZPM Legislature Party aṭangin Vanlalhlana, Lalchhuanthanga leh Dr Vanlalthlana-te an tel a; BJP aṭangin Dr BD Chakma a tel a ni.

MLA-te bakah hian ZPM party aṭangin vice president pahnih - K Sapdanga leh Dr Kenneth Chawngliana te an tel bawk.

Kum 2018 MLA inthlana Serchhip bial aṭanga MLA atana thlan tlin Lalduhoma hi MNF MLA 12-te'n nikum September 22 leh 24 khan an hék a, an hèkna chu thu tlingah ngaiin Assembly Speaker chuan November 27, 2020 khan MLA aṭangin a bán. Hei vang hian ECI chuan April 17, 2021 khan by-election a buatsaih a, Lalduhoma chu thlan tlin leh a ni.