ABCI hnena balu lâk phalna order Tuichang lui kamah hâl a ni

Geology & Mineral Resources department-in National Highway zauh hna thawk mektu ABCI Infrastructure Pvt. Ltd. hnena thla khat chhung atana Tuichang luia balu lâk phalna an pek duh lohna lantir nan Save Tuichang Movement leh Hnahthial Ṭhalai Pawlte chuan nimin khan order copy Tuichang lui kamah an hâl.

Save Tuichang Movement chairman C Lalhlimpuia chuan dodalna an lantir chhan sawiin, "ABCI hian Tuichang lui dung khawih lo hian hmasawnna hna an thawk thei tih kan chiang. Tuichang minor resource-te hi an mamawh a ni lo. Hlâwkna an duh vang chauha la an ni a, an hlâwkna chu keini'n kan tuar a, kan environment an khawih chhiat mai bakah, kan tui tlan hnár an tibawlhhlawh a ni," a ti.

YMA sub-headquarters, Hnahthial president B Lalhming-liana pawhin thu sawiin, "Save Tuichang Movement leh Hnahthial Ṭhalai Pawlte hmalakna hi kan thláwp tlat a ni," a ti a; harsatna leh buaina an tâwk a nih chuan an hnungah YMA an awm reng dawn tih a sawi.

Tuichang kam hi Thawhṭanni chawhnu aṭang khan Save Tuichang Movement leh Hnahthial Ṭhalai Pawl member-te'n an véng a, riahbûk sualin an riahchilh a ni.