Vawiinah ZMC laboratory-ah Swab sample endik dawn lo

Zoram Medical College (ZMC)-a Covid-19 swab sample endikna, Viral Research and Diagnostic Laboratories (VRDL)-a thawk mi pathumin Covid-19 an vei tih hmuh chhuah a ni a, hei vang hian vawiinah ZMC-ah RT-PCR hmangin sample endik a ni dawn lo.

Sorkar thuchhuah tarlan danin, May 7-11, 2021 chhung khan ZMC Covid laboratory-a thawk mi pathum chu Covid-19 positive an ni tih hriat chhuah a nih avangin laboratory chu tihthianghlim a ngai dawn a, laboratory-a thawk dangte pawh khung hran an ngai dawn a ni. Hemi chungchangah hian ZMC hotute chuan mipui hriatthiamna an ngen.

Sorkar thuchhuah chuan, swab sample endiktu tur (back-up team) ngaihtuah mek a nih avangin vawiinah chuan RT-PCR hmanga swab test tih theih a ni dawn lo a, naktuk aṭangin endik chhunzawm theih beisei a nih thu a tarlang.