KHAWTHLIR

Online-a bill Pe turin ngen
Kolasib DC Dr H Lalthlangliana chuan nimin khan tui bill leh electric bill pek dan turah thuchhuah a siam a; online hmanga bill pek ṭheuh tum tur leh online-a bill pe thiam lo/thei lote tan PHE leh Power & Electricity department-te'n a him thei ang berin bill pekna counter an hawn dawn thu a tarlang. Kolasib Bawrhsap chuan, Kolasib district-ah mihring chenna hmun (residential area) huam chhung leh a chhehvelah dan loa gas, petrol leh diesel zawrh emaw, dahṭhat emaw phal loh a nih thu a tarlang bawk.

ICU-ah mi 13 awm
State Referral Hospital-ah Covid-19 vei mi 123 enkawl mek an ni a, chu'ng zinga mi 13 chu ICU-ah enkawl niin, ward-ah mi 110 an awm. SRH-ZMC Bulletin tarlan danin, ICU-a enkawl lai mi 13 zinga 12 chu ventilator hmantir mek an ni a, ward-a awm mi 110 zinga 19 chu oxygen pek mek an ni. Enkawl mek mi 123 zinga panga chu chawlhkar thum aia rei awm tawh an ni a, chawlhkar hnih aia rei awm tawh mi 11 an awm bawk.

MLA-in hlan
Kolasib bialtu MLA K Lalrinliana chuan nimin khan a bial chhunga village level task force (VLTF) duty-te tlawh kualin, VLTF 19 hnenah total lockdown avanga chhungkua harsatna tawkte ṭanpuina atan Rs. 10,000 ṭheuh a hlan.

Walkie talkie pe
AMC Ward-V councillor Rosiamngheta chuan nimin khan ZMC hnenah walkie talkie set ruk a pe. Rosiamngheta chuan, Covid-19 lengah ṭan rual a ṭul thu sawiin, "Nunna kan chàn zel lohna turin kan hmazawn ṭheuhah theihtawp kan chhuah a, party rilru dah boa thawhho a ṭul tak zet. Lockdown vanga chhuanchham an awm lohna turin ṭhenawm khawvengte inbengvar tlan a ngai a ni," a ti.

PC-in lawmawm ti
Peoples Conference party chuan thuchhuah siamin, Assembly speaker Lalrinliana Sailo-in MLA atan Lalduhoma rinawmna thu tiamtira a la lut ta chu lawmawm an tih thu an tarlang.