Lalduhoma lak luh har chhan sawifiah

Assembly speaker Lalrinliana Sailo chuan nimin khan Assembly Annexe conference hall-ah thuthar thehdarhtute a kâwm a, Serchhip bial MLA by-election-a MLA atana thlan tlin Lalduhoma lak luh har a nih chhan a sawifiah.

Lalrinliana Sailo chuan, Lalduhoma chu MLA aṭangin dan ang taka bân a nia sawiin, "A in candidate leh a, a tling a, dan angin lak luh leh a ni mai dawn. May 2, 2021-ah thlan tlin a ni tih official-a puan a ni a, hemi ní vêk hian official-a puan a nih hmain lawmpuina ka thawn. A tukah office ka kal nghal a, Election Commission of India (ECI) aṭanga thlan tlin tih report dawn a nih hunah tikhawtlai loa a hma thei anga lak luh a nih theih nan hma la turin official-te ka hrilh," a ti.

Assembly Secretariat-in May 3, 2021 tlai lamah ECI aṭangin lehkha an dawn thu sawiin Speaker chuan, "CM leh Deputy Speaker ka ráwn a, May 5-a lâk luh turin thutlukna ka siam. May 3 tlaiah May 5-a lak luh turin harsatna a neih leh neih loh zawt turin Pu Duhoma vawi thum ka phone a, min chhang thei lo a, zanah min rawn phone lêt. Ani nen hian kan infiamna nasa ṭhin a 'Dy. Speaker min lak luhtir mai la' tite'n min rawn fiam a ni," a ti a; May 3 zan hian Covid-19 avangin SOP khauh zawk a chhuah thu a sawi.

Assembly Speaker chuan, Covid-19 a hluar thar a, mitthi an awm zut zut thu sawiin, "Kan ruala inthlang ve thote pawh an la inlak luh loh avangin SOP zah ṭha kan ti a ni. Khatih hun laia ruahmanna kan siam dan khan lak luh inkhawm buatsaih dawn ila, MLA zawng zawng, official, ei leh in siamtu, MLA driver leh PSO leh media-te nen min 200 chuang punkhawm a ngai dawn a, mipui an zahawm. Tunah tlem zawkin lak luh programme buatsaih a ni a, MLA-te pawh party tin aiawh pathum chiah sawm an ni," a ti.

Lalrinliana Sailo chuan, Lalduhoma chu inhuatna vanga MLA aṭang bàn a ni lo nia sawiin, "Inhuatna vanga inbàn tur hrim hrim ni se, Pu VL Zaithanzama kha bàn hmasak ber theih a ni. ZPM-in registration an tih dawn khan Pu Zai­thanzama hi treasurer-ah an ruat a, ECI-in an pawmsak. Amah leh an party pawh ka hrilh a, ZPM treasurer aṭanga bànna thehlut turin ka ti a, a thehlut a ni," a ti a, Chief Minister-in MLA aṭanga in bàn mai mai ṭha a ti lo niin a sawi.

Lalduhoma chu a kal ngaia a kal reng avangin MNF MLA 12-te'n bàn tura an ngen tak thu sawiin Lalrinliana chuan, "Speaker hian thuneihna a lo nei sang khawp a, duh chuan ni khat emaw, kum 6 atan pawh a bàn thei a ni. Mahse, Chief Minister ngeiin in candidate leh thei ngei tura bàn ṭha a ti a ni. Pu Lalduhoma huat vang leh hnawksak tih vang hrim hrima MLA aṭanga bàn anga sawi awm hi thu dik a ni lo," a ti.

Lalrinliana Sailo chuan, social media-a thu leh hla tam ṭhin lutuk chu vanduaithlak a tih thu sawiin, "Editor ni lo thuziak hi a zîktluak em tih hi ngaihtuah a va ṭha em. Editor chuan inkaihhruaina fel tak hnuaiah fimkhur takin thu an ziak ṭhin. Social media-a ninhlei tak tak ho hi chhungkaw inenkawlna fel tak an váng khawp mai. Fake account pawh zalen takin an lên vel theihna a ni," a ti a; social media-a thuziak thehdarh leh chhawn vak vakte chu ram tan a ṭha ber em tih a ngaihtuah ṭhin thu a sawi.