MLA-in kawng siam mek a endik

Lengteng bialtu MLA L Thangmawia chuan nimin khan Saitual-Saichal kawng NH-102B siam mek a tlawh a; hna thawktute kâwmin, "He kawng hi kan mit naute tluka kan ngaih pawimawh a ni a, ṭha taka siam hi thil tihmâkmawh a ni," a ti.

L Thangmawia chuan, Mizoram sorkar enkawl kawng siam hna vilpui tura YMA nena inremna siam a nih thu sawiin, "Hemi piah lama Central sorkar hnuaia company hnathawh mek enpui hna YMA-in tlawmngaia an thawk hi neitu rilru aṭanga lo chhuak a ni," a ti a; YMA chu thawhhopui zel tur leh NHIDCL hotute pawh ngun zawka hna vil turin a hrilh.

MLA chuan, Saitual-Saichal kawng leh Mizoram hmun hrang hranga kawng siam eng emaw zat chu sorkar laipui hnuaiah company-in direct-a an enkawl a nih thu sawiin, "State sorkarina a dawhthlèng kan lo dawh mai a nihna chen a awm. Sum tam tak sên ral hmanga kawng ṭha tak leh chhawrnahawm tak kan neih theihna tura theihtawp lo chhuah a, lo enpui leh lo ṭanpui hi kan tih tur a ni," a ti.

Kawng siam meka duh­thu­­sam lo lai deuhte chu tual­chhung contractor, Mizote chan a ni deuh zel tih sawiin L Thangmawia chuan, "Heng hna hi vai company liante'n hneh zawk leh ṭha zawka an thawh theih a nih laiin, ram leilung fate kuta a hlâwkna lut tur duhin, phase hrang hrang pangaah ṭhena thawhtir an ni a, tualchhung miin an hna chan laia sawisel tur a awm hi a pawi tak zet a ni," a ti a, a ṭha lo laite siamṭha leh vek turin a hrilh a ni.

Saitual additional DC Margaret Lalrinawmi chuan, kawng dinhmun leh siamṭhat a nihna turah a ṭul anga hmalak an tum thu leh Chief Secretary hnenah report an thehluh nghal tur thu a sawi.

Saitual-Saichal kawng siam mek endiknaah hian PWD Saitual Division EE leh SDO-te bakah Saichal, Pàwlráng, Hliappui leh Changzawl VC aiawhte an tel a ni.