Mizoram Legislative Assembly-in An kum 50 tlin an lawm mek

Mizoram State Legislative Assembly kum 50-na, golden jubilee lawm mek a ni a, May 10, 2022-ah a khârna hun buatsaih a ni dawn.

Legislative Assembly kum 50 tlin lawm mek a nih thu hi nimin khan Assembly speaker Lalrinliana Sailo chuan thuthar thehdarhtute a hrilh a, "Assembly Secretariat kum 50 tlin kan lawm thei hi a ropui ka ti tak zet. May 10, 1972 khan MLA atana thlan tlinte'n rinawmna thu an tiam hnuah Speaker an thlang a, chu chu Mizoram Legislative Assembly din ṭan huna pawm a ni. Kum 1997 khan Silver Jubilee ropui taka lawm a ni," a ti.

Lalrinliana Sailo sawi danin, Mizoram Legislative Assembly hmasa bera member zingah Dr H Thansanga (speaker), Sangchhum, KL Rochama, Dotinaia leh C Chawngkunga te tunah an la dam a ni.

Assembly Speaker chuan, Legislative Assembly chu a zahawmna ṭha taka vawn ṭhin a nih thu sawiin, "Tun hnaiah tlemin Assembly House zahawmna hawlh lek leka nawrtu an awm ṭhin. Member-te páwnah thu inchuha inûm zui a awm deuh hlek a, CCTV nuaibo anga inpuhnate a awm a ni," a ti a; CCTV footage chu nuaibo a nih loh thu a sawi. CCTV footage chu thuthar thehdarhtute an entir nghal.

Assembly secretary H Lalrinawma sawi danin, TJ Lalnuntluanga leh C Ngunlianchunga inhnial buai hun chu March 15, tlai dar 5:12 a ni a; CCTV footage chu tihbo a ni lo a, a ṭul leh a ngaih huna en theih turin kawl ṭhat a ni.