BVT-ah Covid-19 vei 110 an awm mek : Aizawlah hripui vei hmuh lohna veng 2 awm

Aizawla veng hrang hrang zingah Bethlehem Vengthlangah Covid-19 vei mek tam berin, nimin chhun thleng khan mi 110 enkawl mek an ni. Hetihlai hian Covid-19 thawh hnihna lèn hnuah Chite Veng leh Ramhlun Sports Complex-ah hripui kái an awm lo.

Bethlehem Vengthlang Local Task Force (LTF) Secretary hnen aṭanga thu dawn danin, an vengah hian nimin chhun thleng khan Covid-19 positive mi 165 hmuh chhuah a ni tawh a, chu'ng zinga mi 110 chu enkawl mek niin, mi 55 chu dam takin an chhuak tawh. Covid-19 vei thi pakhat an nei tawh.

Chhinga Vengah chuan nimin thleng khan Covid-19 positive mi 181 hmuh chhuah a ni tawh a, mi 77 chhuak tawhin, enkawl mek mi 104 an awm.

Electric Vengah chuan hripui vei mi 137 hmuh chhuah a ni tawh a, chu'ng zinga mi 83 chu enkawl mek niin, mi 54 chu dam takin an chhuak tawh a, thi an la awm lo.

Chanmari-ah chuan Covid-19 thawh hnihna (second wave) lèn hnuah (kumin April thla tìr lam aṭangin) hripui vei mi 95 hmuh chhuah a ni tawh. Mi 95 zinga mi 40 chu chhuak tawhin, enkawl mek mi 55 an awm a, thi an la awm lo a ni.

Covid-19 léng thawh hnihna hnuah positive tamna vengte zinga mi hriat, Bawngkawnah chuan hripui vei mi 60 hmuh chhuah a ni tawh a, mi 23 chhuak tawhin, enkawl mek mi 36 an awm a, mi pakhat a thi tawh.

Kumin April thla tìr lam aṭanga Mizorama Covid-19 thawh hnihna a lèn hnuah Aizawla veng (local council) tin deuh thawah hripui vei hmuh a ni tawh a; chutih laiin, Chite Veng leh Ramhlun Sports Complex-ah chuan Covid thawh hnihna lèn hnuah hripui vei hmuh a la ni loa thu dawn a ni.

Model Vengah chuan Covid-19 positive mi pathum chiah hmuh chhuah a la ni a, an vaiin state páwn aṭanga haw niin, tualchhunga kái an la awm lo. Mi pathum zinga pahnih chu tun hnaia West Bengal inthlana duty police rawn haw an ni a, Model Venga awm rih lo, battalion hmuna awm an ni.

Hripui vei mek tam berna nia hriat Bethlehem Vengthlangah hian hmun ṭhenkhat chu containment area a nih mek avang leh hun eng emaw chen inkhuahkhirh/inkhàrkhip a nih tawh avangin LTF-in chhungkaw 152 hnenah ṭanpuina an pe tawh a; pawisa, buhfai, chawhmehte leh mamawh dangte an pe a ni.

Bethlehem Vengthlang LTF Secretary chuan, an vengah mi 1,000-te swab sample lak tawh a nih thu leh mi 390 vel inkhungtir (home quarantine) mek an nih thu Vanglaini a hrilh. Covid-19 vei 83 awm mekna Electric Veng LTF Secretary chuan Vanglaini palai zawhna chhangin, an vengah hripui vei an tam avang leh hmun ṭhenkhat containment area-a puan a nih avangin harsatna lian tham lutuk an la tawk lo tih a sawi a, "Veng chhunga ei leh bàra harsate chu tun dinhmunah YMA-in ṭanpuina an pe ṭhin," a ti.

Electric Veng LTF Secretary chuan, "Pathian zarah kan vengah he hri avanga nunna chán kan la awm lo a, a lawmawm khawp mai," a ti a; chutih rualin, an venga MUP member ṭhenkhat chu SRH-ZMC-a enkawl ngai an awm nual thu a sawi. Chanmari LTF hruaitute chuan, an venga khawsak harsa deuh nia an hriat chhungkaw panga hnenah LTF-in ṭanpuina - pawisa leh ei leh in tur an pek tawh thu Vanglaini an hrilh. Bawngkawn LTF hruaitute pawhin an veng chhunga chhungkua khawsak harsate LTF-in ṭanpui an nei nual tawh tih an sawi bawk.